უმცირესობის წევრის, გიორგი კანდელაკის თქმით, ოთხოზორია-ტატუნაშვილის სიას მაგნიტსკის სიაზე მომუშავე ევროპარლამენტარები უჭერენ მხარს.

დღეს, საქართველოს პარლამენტის ბიუროს სხდომა გაიმართება, სადაც ევროპული საქართველო ოთხოზორია-ტატუნაშვილის სიის სახელით შექმნილი რეზოლუციის პროექტს წარადგენს. რეზოლუციის იდეა სერგი კაპანაძეს ეკუთვნის. რეზოლუციის მიზანი იმ ადამიანების გამოვლენა და დასჯაა, რომლებიც საქართველოს მოქალაქეების გატაცებასა და წამებაში იქნებიან ეჭვმიტანილნი.

ტატუნაშვილის საქმე

22 თებერვალს ცხინვალის ციხეში საქართველოს მოქალაქე გარდაიცვალა. ოსური მხარის ვერსიით, არჩილ ტატუნაშვილმა იზოლატორში გადაყვანისას პოლიციელისთვის იარაღის წართმევა სცადა, საპასუხო ძალის გამოყენების შედეგად შეუძლოდ გახდა, კიბეებზე წაიქცა და მოგვიანებით საავადმყოფოში დაიღუპა.

სახელმწიფო უსაფრთხოების სამსახურის ინფორმაციით, ოსური მხარე აცხადებს, რომ ტატუნაშვილი ინფარქტით დაიღუპა და მისი ცხედრის ექსპერტიზაზე უარს ამბობს. გარდაცვლილის ცხედარი ოკუპირებულ ცხინვალს 24 თებერვალს უნდა გადმოესვენებინა, თუმცა დე ფაქტო ხელისუფლებამ პოზიცია შეცვალა.

ახალგორში არჩილ ტატუნაშვილთან ერთად დაკავებული იყო საქართველოს კიდევ ორი მოქალაქე. სუს-ის ცნობით, ლევან ქუტაშვილი და იოსებ პავლიაშვილი უკვე ცხინვალის ციხიდან ახალგორში გადაიყვანეს. ოსური მხარე მათ გადმოცემაზე უარს ამბობს.