თავისუფალი დემოკრატების ლიდერის, ირაკლი ალასანიას თქმით, ჯონ კერისა და ოპოზიციის წარმომადგენლებს შორის საუბარი არა მხოლოდ რუსთავი 2-ს, არამედ ყველა იმ სხვა მედია საშუალებას შეეხო, რომლებშიც ძალიან პოპულარული გადაცემები გააუქმეს, არხის თანამშრომლები კი დაკავებული თანამდებობებიდან გაუშვეს.

ალასანიას თქმით, კერის მიაჩნია, რომ მედია ხელისუფლებისგან სრულად დამოუკიდებელი უნდა იყოს და ნებისმიერ პოლიტიკურ პარტიას თანაბრად უნდა შეეძლოს შეღწევა:

"ვისაუბრეთ, რომ თავდაცვისუნარიანობის ამაღლებასთან ერთად საჭიროა საქართველო გახდეს რეალური დემოკრატია და ვისაუბრეთ არჩევნებზე, მედიის თავისუფლებაზე, განსაკუთრებით სატელევიზიო მედიაში მიმდინარე პროცესებზე. [კერიმ] ძალიან ნათელი პოზიცია დააფიქსირა, რომ ამერიკის შეერთებული შტატები იქნება მედიის მხარდამჭერი და მას აქვს ზუსტი ინფორმაცია, თუ რა ვითარებაშია დღეს მედია და დიდი იმედი აქვს, რომ შეხვედრები, რაც ჩაატარა ხელისუფლების წარმომადგენლებთან, ამ მიმართულებითაც პოზიტიურ შედეგებს გამოიღებს".

აშშ-ს სახელმწიფო მდივანთან შეხვედრას ერთიანი ნაციონალური მოძრაობისა და თავისუფალი დემოკრატების წევრები დაესწრნენ.

ჯონ კერი საქართველოს 7 ივლისს ეწვია. ვიზიტის ფარგლებში ორ ქვეყანას შორის სტრატეგიული პარტნიორობის შესახებ რეფერენდუმს მოაწერეს ხელი. კერიმ თბილისი დღეს დატოვა. ხვალ კი ვარშავაში ნატოს სამიტი იწყება.