ევროპარლამენტის საგარეო ურთიერთობათა კომიტეტმა საქართველოსთვის უვიზო მიმოსვლას მხარი დაუჭირა. მომხსენებელმა ანდრეს მამიკინსმა სხდომაზე განაცხადა, რომ სავიზო ლიბერალიზაციისთვის საქართველომ ყველა კრიტერიუმი დააკმაყოფილა.

საქართველოს გარდა კომიტეტმა მხარი დაუჭირა უკრაინისა და კოსოვოსთვის უვიზო მიმოსვლის დაწესებას.

დღესვე, სამოქალაქო თავისუფლებათა, მართლმსაჯულებისა და შინაგან საქმეთა კომიტეტშია დაგეგმილი შეჩერების მექანიზმის შესახებ მსჯელობა, რის შემდეგაც ელექტრონული კენჭისყრა შედგება.

20 ივნისს, ევროკავშირის საბჭოში, საგარეო საქმეთა მინისტრები შეთანხმდნენ, რომ სავიზო ლიბერალიზაციისთვის საქართველომ ყველა კრიტერიუმი შეასრულა. გერმანიის საგარეო საქმეთა მინისტრმა ფრანკ-ვალტერ შტაინმაიერმა საქართველოში ვიზიტისას განაცხადა, რომ ევროპარლამენტში რიგი ფორმალური საკითხები დარჩა გადასაწყვეტი, მათ შორის ივლისის ბოლომდე შეჩერების მექანიზმის ამოქმედების შესახებ ევროპარლამენტმა უნდა მიიღოს გადაწყვეტილება.

მისი თქმით, საქართველოსთვის ლოგიკურ გადაწყვეტილებამდე სექტემბრის მეორე ნახევარში მივლენ.