საქართველოს შინაგან საქმეთა სამინისტრო ადასტურებს, რომ პანორამა თბილისის მშენებლობისას ერთი მუშა გარდაიცვალა. მართალია, შემთხვევა დაახლოებით ერთი თვის წინ, 21 იანვარს მოხდა, თუმცა ამ დრომდე უცნობი იყო.

უწყების ინფორმაციით, თაბორის მთაზე მშენებლობის დროს ხარაჩო ჩამოინგრა და 1990 წელს დაბადებული კაცი გარდაიცვალა. შსს-ს განცხადებით, სამუშაოებს შპს თაბორი-რიზორსის მიერ დაქიარავებული შპს ინ-სი ასრულებდა და პასუხისმგებლობაც მას ეკისრება.

"საქმეზე დაკითხულია შემთხვევის შემსწრე კომპანიის თანამშრომლები, სამუშაოების მწარმოებელი და ზედამხედველი პირები. ასევე, დანიშნულია შესაბამისი ექსპერტიზები, როგორც სასამართლო-სამედიცინო, ასევე კომპლექსური, შრომის უსაფრთხოების და სამშენებლო ტექნიკური ექსპერტიზები", - აღნიშნავენ შსს-ში.

მუშის გარდაცვალების შესახებ ინფორმაცია ifact-მა დღეს, 23 თებერვალს გაავრცელა. მათი ცნობით, 21 იანვრის საღამოს, 4-დან 5 საათამდე ლევანი თავის მოვალეობას ასრულებდა, როცა ზედა სართულზე ახლადდასხმული ბეტონის ჭერი ჩამოინგრა და ქვეშ მოიყოლა.

"შემთხვევის თვითმხილველი ამბობს, რომ ბეტონის ჭერი საკმარისად გამაგრებული არ იყო და ჩამოშლაც ამან გამოიწვია. ლაფაჩს რეზინის მილი ხელში ეჭირა და ბეტონს ასხამდა. მის გარდა ამ დროს იქ, სადაც ჭერი ჩამოწვა, არავინ იყო. ვინაიდან მუშები ხელფასს გამომუშავების მაჩვენებლის მიხედვით იღებდნენ, ცდილობდნენ, რაც შეიძლება მეტი საქმე ნაკლებ დროში მოესწროთ. ამიტომ ბეტონის ბოძები, რომლებსაც ჭერი უნდა დაეჭირათ ჯერ კიდევ სველი იყო, როცა ზემოდან ბეტონის საფარი დაასხეს. ბოძებმა სიმძიმეს ვერ გაუძლო და ჩამოწვა",- წერს ifact.

საქმეზე გამოძიება სისხლის სამართლის კოდექსის 240-ე მუხლის მეორე ნაწილით დაიწყო.