საქართველოს პრემიერმინისტრის წარმომადგენელი რუსეთთან ურთიერთობის საკითხებში, ზურაბ აბაშიძე მიიჩნევს, რომ ხელისუფლებამ პირადად აშშ-ში საქართველოს ელჩთან, არჩილ გეგეშიძესთან უნდა გაარკვიოს, თუ რა განცხადება გააკეთა მან მმართველ გუნდში რუსული ძალების არსებობაზე.

“ნეტგაზეთის” ბლოგერთან, ია მერკვილაძესთან ინტერვიუში არჩილ გეგეშიძე ამბობს, რომ მმართველ გუნდში პრორუსული ძალები არსებობენ, და ეს იმას ნიშნავს, რომ საქართველოში ამ საკითხის მიმართ პლურალისტური მიდგომა არსებობს.

ამ განცხადების მერე არჩილ გეგეშიძე განმარტებისთვის საქართველოში დაიბარეს. ის თბილისში დღეს ჩამოვიდა, თუმცა, კომენტარი არ გაუკეთებია.

ზურაბ აბაშიძეს დღეს ჟურნალისტებმა კითხეს, რამდენად მიზანშეწონილია ელჩის მხრიდან მსგავსი განცხადება, რაზეც მან უპასუხა:

"გარკვევაა საჭირო უპირველეს ყოვლისა რა იყო, რა ითქვა, თუ ჟურნალისტთან რაღაც ინტერვიუზეა საუბარი, ალბათ უნდა გავერკვეთ რა იყო რეალობაში. მე ვფიქრობ, რომ მას შემდეგ, რაც ელჩი ჩამოვა, რამდენადაც ვიცი, ის უკვე თბილისშია, საგარეო საქმეთა სამინისტროში გაივლიან ამ თემას, გაერკვევიან, ჩამოყალიბდებიან და ამის შემდეგ გავაკეთოთ შემდგომ დასკვნები, ჯერ ნუ ვიჩქარებთ.

სანამ რაღაც პუბლიკაციის მიხედვით ვიმსჯელებთ, სჯობს ჯერ ელჩს ვკითხოთ, თვითონ მისგან მოვისმინოთ რა იყო, როგორ იყო, ხომ შეიძლება ჟურნალისტს რაღაც შეშლოდა, მეც ხშირად ვყოფილვარ ასეთ ვითარებაში და გარკვეულა, რომ მთლად ისეც არ ყოფილა, როგორც ჟურნალისტს გაუშუქებია ეს. ამიტომ სჯობს, მოვისმინოთ ელჩისგან, ელჩი ძალიან დიდი თანამდებობაა. ის აშშ-ში წარმოადგენს ჩვენს ქვეყანას, ამიტომ ნდობის ხარისხი მის მიმართ უნდა იყოს ძალიან მაღალი, არის კიდეც, ეს აქამდე ასე იყო".