სამხრეთ ოსეთის დე ფაქტო ხელისუფლება ადგილობრივ ჟურნალისტ ირინა კელეხსაევაზე ზეწოლას ახდენს. კერძოდ, მწვავე რეაქცია რადიო თავისუფლების ქართული ბიუროს რუსულენოვანი რედაქციის ვებგვერდზე გამოქვეყნებულმა სტატიამ "როგორ იკამათეს პრეზიდენტმა და ინვესტორმა" მოჰყვა.

ეხო კავკაზას ცნობით, რადიო სადგური, სადაც ირინა მუშაობს, რეგიონის დე ფაქტო ძალოვანებმა ორდერის წარდგენის გარეშე გაჩხრიკეს. მოგვიანებით, კელეხსაევას რადიოში თანამდებობის დატოვების შესახებ განცხადების დაწერა მოსთხოვეს.

კელეხსაევას თქმით, ორშაბათს დილით, სამსახურში მისულს კაბინეტში 6 კაცი დახვდა:

"კაცები, რომელთა შორის სახელმწიფო უსაფრთხოებისა და პრეზიდენტის პირადი დაცვის თანამშრომლები ამოვიცანი, ამოწმებდნენ დოკუმენტებს და იწერდნენ გარკვეულ ფაილებს. არ ვიცი რა აინტერესებდათ. კომპიუტერებთან დაახლოებით 1 საათი გაატარეს, შემდეგ წავიდნენ. სამუშაო დღის დასრულების შემდეგ, ბუღალტერიიდან დამირეკეს. მითხრეს, ოფისში დავბრუნებულიყავი და საკუთარი სურვილით სამსახურის დატოვების შესახებ განცხადება დამეწერა. ვუპასუხე, რომ ძალიან მიყვარს ჩემი სამსახური, წასვლის საფუძველს ვერ ვხედავ და არანაირ განცხადებას არ დავწერდი."

ჟურნალისტის თქმით, რადიოს დირექტორისგან მისი გათავისუფლება შაბათს მოითხოვეს, თუმცა დირექტორმა უარი თქვა და აღნიშნა, რომ კელეხსაევასთან პრეტენზიები არ აქვს.

ჟურნალისტზე ზეწოლა სოციალურ ქსელებში მისი დისკრედიტაციის კამპანიით, ეხო კავკაზას ვებგვერდზე სტატიის გამოქვეყნების შემდეგ დაიწყო. სტატიაში საუბარი იყო სამხრეთ ოსეთის დე ფაქტო პრეზიდენტს, ანატოლი ბიბილოვსა და ცნობილ რუს ბიზნესმენ თაიმურაზ ბოლოევს შორის კონფლიქტზე.

ეს პირველი შემთხვევა არაა, როდესაც სამხრეთ ოსეთში ჟურნალისტზე ზეწოლა ხდება. ეხო კავკაზასა და ნეტგაზეთის კონტრიბუტორი თამარ მეარაყიშვილი სამხრეთ ოსეთის დე ფაქტო რესპუბლიკის მილიციამ 2017 წლის 16 აგვისტოს დააკავა. მას შემდეგ, მეარაყიშვილი, ფაქტობრივად შინაპატიმრობაში იმყოფება. მას მმართველი პარტიის მიმართ ცილისწამებაში სდებენ ბრალს.