საატესტატო გამოცდები შეცვლილი ფორმატით ჩატარდება. ტესტირების დასრულებისას მოსწავლე აღარ შეფასდება ქულით, ის ეკრანზე დაინახავს შეტყობინებას იმის შესახებ, გადალახა თუ არა მან მინიმალური კომპეტენციის ზღვარი. ამის შესახებ მაია მიმინოშვილმა პრესკონფერენციაზე განაცხადა.

გამოცდების ეროვნული ცენტრის დირექტორის თქმით, მინიმალური კომპეტენციის ზღვარი ისევ 5,5 ქულა რჩება.

გამოსაშვები გამოცდები წელსაც ორ ეტაპად, მე-11 და მე-12 კლასებში ჩატარდება. მე-11 კლასის მოსწავლეები სასწავლო წლის ბოლოს იმ საგნებს ჩააბარებენ, რომელთა სწავლას ასრულებენ (ფიზიკა, ქიმია, ბიოლოგია, გეოგრაფია). დარჩენილ 4 საგანში კი ტესტირებას (მათემატიკა, ქართული ენა და ლიტერატურა, უცხოური ენა, ისტორია) მოსწავლეები სკოლის დამთავრებისას გაივლიან. თუმცა, ის მოსწავლეები, რომლებმაც მე-11 კლასის გამოცდაზე რომელიმე საგანი ვერ ჩააბარეს, ტესტირებას მე-12 კლასში, ხელახლა გაივლიან.

სკოლის დამამთავრებელი გამოცდები კომპიუტერზე ადაპტირებული ტესტირების ქართული მოდელით (Gcat) ტარდება.