საუდის არაბეთის ქალაქ მედინაში, ისლამის ერთ-ერთ ყველაზე წმინდა ქალაქში, თვითმკვლელმა ტერორისტმა აიფეთქა თავი. ამის შესახებ BBC იუწყება al-Arabiya TV -ზე დაყრდნობით.

გამოცემის თანახმად, ჯერჯერობით მსხვერპლის შესახებ ინფორმაცია არ ვრცელდება.

Aljazeera-ს ცნობით, მანამდე ორი აფეთქება განხორციელდა აღმოსავლეთის ქალაქ ქატიფში, რომელიც შიიტი მუსლიმებითაა დასახლებული. თვითმხილველთა განცხადებით, თვითმკვლელმა ტერორისტმა შიიტების მეჩეთთან აიფეთქა თავი, ისე რომ სხვა არავინ დაშავებულა.

ფოტო: BBC

უცნობია ვინ დგას თავდასხმის უკან, რომელიც რამადანის წმინდა თვეს განხორციელდა.

მანამდე, საუდის არაბეთში, ქალაქ ჯიდაში აშშ-ს საკონსულოსთან მოხდა თავდასხმა, სადაც თვითმკვლელი ტერორისტი ასაფეთქებელი მოწყობილობის ამოქმედებას საკონსულოს შენობასთან გეგმავდა. დაცვის თანამშრომლებმა მისი შეჩერება სცადეს, რის შემდეგაც თავდამსხმელმა მანქანების სადგომზე აიფეთქა თავი. მომხდარის შედეგად დაცვის 2 თანამშრომელი დაშავდა.