გაერთიანებულ სამეფოში პირველმა კერძო პოლიციამ 400-ზე მეტი საქმე გამოიძია. ამ საქმეების უმეტესობა კერძო პოლიციას საჯარო სექტორმა მოუცლელობის გამო გადასცა და როგორც აღმოჩნდა, კომპანიამ დაკისრებულ საქმეს თავი კარგად გაართვა. გარდა ამისა, კერძო პოლიცია იმ საქმეების გამოძიებითაცაა დაკავებული, რომლებიც საჯარო პოლიციამ ვერ გახსნა.

TM Eye - ასე ქვია კომპანიას, რომელიც ამ საქმითაა დაკავებული. ის 2007 წელს ყოფილი პოლიციელის მიერ შეიქმნა და დღეს უკვე ერთ-ერთი ყველაზე წარმატებული ორგანიზაციაა თავდაცვის სფეროში.

კომპანიის მიერ გახსნილი საქმეების უტყუარობას სასამართლო გადაწყვეტილებებიც მოწმობს. ყველა დამნაშავე, რომელიც კომპანიამ გამოავლინა, სასამართლომ დამნაშავედ სცნო. კერძო პოლიცია მოპოვებული ნდობის გამო, კიდევ უფრო მეტ საქმეს მიიღებს გამოსაძიებლად.

TM Eye-ის კომპეტენციაში ფაქტობრივად ყველა ის საქმე შედის, რომელსაც ჩვეულებრივი პოლიციაც ფარავს. კომპანიის სამუშაოს სამი მთავარი მიმართულებაა:

  • პირადი დაცვა, რომელიც მოიცავს როგორც კერძო საკუთრების დაცვას, ისე ფიზიკურ დაცვასაც;
  • მკვლელობების გახმაურებული საქმეების გამოძიება, რომელთა გახსნაც ჩვეულებრივმა პოლიციამ ვერ შეძლო, მათ შორის კორუფციისა და სხვა მიზეზთა გამო ჩადენილი დანაშაულები;
  • გაუპატიურებების, სამძებრო სამუშაოების, ქურდობების, დაყაჩაღებებისა და დაშანტაჟების საქმეების გამოძიება და მსხვერპლთათვის დახმარების გაწევა;

კომპანია ფაქტობრივად მთლიანად ყოფილი პოლიციელებისგან შედგება და მათი უმრავლესობა კარგად გამოცდილი პროფესიონალია. კერძო პოლიციას დიდი ამბიციები აქვს და სამომავლოდ გაფართოებას უფრო მეტად აპირებს.

როგორც კომპანიის დამფუძნებელი ამბობს, მათ ჩვეულებრივ პოლიციაზე ეფექტური შემადგენლობა და აღჭურვილობა აქვთ. ის იმედოვნებს, რომ რიგითი პოლიციელები ისურვებენ მის კომპანიაში გადმოსვლას და თავისუფალი გრაფიკით მუშაობას.

„ჩვენ ძალიან ბევრ საიდუმლო საქმეზე ვმუშაობთ, გაცილებით მეტზე, ვიდრე სახელმწიფო ძალოვანი უწყებები. გარდა ამისა, ჩვენ გვაქვს უკეთესი თავდაცვის მექანიზმები და აღჭურვილობა, ვიდრე ჩვეულებრივ პოლიციას“, - ამბობს დევიდ მაქკელვი.

„ჩვენთან მოსულ პოლიციელებს ვპირდებით უკეთეს სამუშაო გრაფიკს, უკეთეს ანაზღაურებას, უკეთეს უნიფორმებსა და გვერდში დგომას. ეს ინდუსტრია იზრდება და მას დიდი მომავალი აქვს“, - დაამატა მან.

კერძო პოლიციის გაძლიერებას თავისი კრიტიკოსებიც ყავს, რომლებიც ამბობენ, რომ კომპანიების გაძლიერება ამ სფეროში შეასუსტებს სახელმწიფო ძალოვან სტრუქტურებს. გარდა ამისა, კერძო პოლიციის გაძლიერება წარმოშობს ორ პოლუსოვან სისტემას, სადაც მდიდრები უფრო დაცულნი იქნებიან, ვიდრე ღარიბები.