შინაგან საქმეთა სამინისტროს ინფორმაციით, დისკრიმინაციული მოტივით, გენდერული იდენტობის ნიშნით ჩადენილი დანაშაულის ბრალდებით ორი პირია დაკავებული. კერძოდ, ორი ტრანსგენდერი ქალისა და სასწრაფოს თანამშრომლის ცემაში ბრალდებულები.

შსს-ს ინფორმაციით, დაკავებულები დანაშაულს აღიარებენ. გამოძიება პირთა ჯგუფის მიერ ორი ან მეტი პირის მიმართ ჩადენილი ძალადობის ფაქტზე მიმდინარეობს. მათ მიერ ჩადენილი დანაშაული 1-დან 3-წლამდე თავისუფლების აღკვეთას ითვალისწინებს.

ტრანსგენდერი ქალი გაბრიელა On.ge-სთან საუბარში ჰყვება, რომ 3 თებერვალს, საღამოს გმირთა მოედანზე ერთი პირი თავს დაესხა. ხოლო, საავადმყოფოში გადაყვანის შემდეგ, მას და მის მეგობრებს, მათ შორის ტრანსგენდერ ქალ მირანდა ფაღავას და სასწრაფოს თანამშრომელს კიდევ სხვა პირებიც გაუსწორდნენ ფიზიკურად.