ტელეკომპანია რუსთავი 2-ის დირექტორი, ნიკა გვარამია ამბობს, რომ ტელეარხის ყოფილ თანამშრომელს, აკაკი გოგიჩაიშვილს პრეტენზიები მხოლოდ ხელფასთან დაკავშირებით ჰქონდა. მისივე თქმით, არც გადაცემა ბიზნესკურიერის რომელიმე თანამშრომელი მისულა მასთან პრეტენზიებით. ასე გამოეხმაურა გვარამია გოგიჩაიშვილის ბრალდებებს ერთპიროვნულ გადაწყვეტილებებსა და პოლიტიკური მოტივით დაბლოკილ სიუჟეტებზე.

"თვითონ ამბობს, რომ პოლიტიკური ნიშნით იბლოკებოდა სიუჟეტები, ბატონი გოგიჩაიშვილი პოლიტიკურ სიუჟეტებს არ აკეთებდა და რომელი სიუჟეტი დაებლოკა. თქვას მაშინ რომელი სიუჟეტი დაებლოკა და რა მოტივაციით, დიდი სიამოვნებით მოვისმენ," - უთხრა On.ge-ს გვარამიამ.

მისი თქმით, მისი გადაწყვეტილებით არხზე არ გავიდა რამდენიმე სიუჟეტი, რომელიც რუსთავი 2-ის პარტნიორებთან ურთიერთობას აფუჭებდა.

"ამ ვითარებაში ყოველთვის მივიღებთ იმ გადაწყვეტილებას, რომელიც აწყობს არხს და არა ცალკეულ ჟურნალისტს თუ გადაცემას", - განმარტა გვარამიამ.

გვარამია ამბობს, რომ გოგიჩაიშვილმა არჩევანი 30-პროცენტიან რუსთავი 2-სა და 0,3-პროცენტიან იბერიას შორის გააკეთა.

"მისი გადაცემები დაიხურა ერთპიროვნულად ჩემ მიერ იმიტომ, რომ არ იყო რეიტინგული და ამაში ფულის გადახდა, კრიზისულ ვითარებაში, არ ჩავთვალე საჭიროდ", - ამბობს გვარამია და დასძენს, რომ ბიზნესკურიერზე მაღალი რეიტინგი ტვ პირველზე მსგავსი ფორმატის გადაცემას ჰქონდა.

"როდესაც 2-პროცენტიან ტვ პირველზე არსებული ბიზნეს გადაცემა უფრო პოპულარულია, ვიდრე 30-პროცენტიან არხზე გადაცემა. მგონი, ეს უკვე მეტყველებს გადაცემის ხარისხზე. ბატონ გოგიჩაიშვილთან დაკავშირებით ის გადაწყვეტილება, რომელიც მივიღეთ, იყო სწორი", - დასძინა რუსთავი 2-ის დირექტორმა.

აკაკი გოგიჩაიშვილმა რუსთავი 2 რამდენიმე დღის წინ დატოვა და ტელეკომპანია იბერიაზე გადავიდა. მანამდე, გოგიჩაიშვილს რუსთავი 2-ზე 20-წლიანი მუშაობის განმავლობაში, საჯაროდ არხი და მისი სარედაქციო პოლიტიკა არ გაუკრიტიკებია. ახლა კი ის ამბობს, რომ რუსთავი 2-ში მთავარი პრობლემა გადაწყვეტილებების ერთპიროვნული მიღება და სიუჟეტების დაბლოკვაა.