თურქეთის ხელისუფლებამ ქვეყნის სამხრეთ საზღვართან, სირიის ტერიტორიაზე, სახმელეთო ოპერაცია "ზეთისხილის ტოტი" დაიწყო. ამის შესახებ ანკარაში შეკრებილ ჟურნალისტებს თურქეთის პრემიერმინისტრმა ბინალი ილდირიმმა განუცხადა.

თურქეთის ხელისუფლების მიზანია, სირიის აფრინის რეგიონი, რომელიც ქურთმა მებრძოლებმა სამოქალაქო ომის დროს დაიკავეს, მათგან გაწმინდოს და თურქეთის საზღვრის გასწვრივ, სირიის ტერიტორიაზე, 30 კილომეტრი სიღრმის ე.წ. უსაფრთხო ზონა შექმნას.

თურქეთი ქვეყნის უსაფრთხოებისთვის პირდაპირ საფრთხედ აღიქვამს მოსაზღვრე სირიაში ქურთების პოზიციების გაძლიერებას. 21 იანვრის სახმელეთო ოპერაციას წინ უძღოდა საჰაერო იერიშები ქურთების მიერ კონტროლირებად ტერიტორიაზე. საპასუხოდ, ქურთმა მებრძოლებმა ცეცხლი გახსნეს თურქეთის მიმართულებით. საზღვრისპირა თურქულ ქალაქ კილისში ორი ადამიანი დაშავდა.

სახმელეთო ოპერაციის დაწყების შესახებ, თურქეთის ხელისუფლებამ გააფრთხილა უცხო ქვეყნის ელჩები.