საზოგადოებივი მაუწყებლის ეთერში გადაცემა რეალური სივრცე ბრუნდება. პირველი გადაცემა პარასკევს, 26 იანვარს გავა.

როგორც გადაცემის წამყვანმა, ნინო ზაუტაშვილმა On.ge-ს უთხრა გადაცემა ეთერში კვირაში ერთხელ, შეცვლილი ფორმატით და შემოკლებული ქრონომეტრაჟით გავა:

"ცვლილებები იქნება ფორმატში, წამყვანთან ერთად ჟურნალისტები დაემატებიან, როგორც თანაწამყვანები. იქნება პატარა ისტორიები, რომელსაც თავად ჟურნალისტები შემოიტანენ, რომლებმაც იმუშავეს კონკრეტულ თემაზე. ერთობლივად გავუძღვებით ამ თემას და იქნება დისკუსია. იქნება ძალიან პრობლემატური საკითხები და დისკუსია ამ საკითხებზე ყველა დაინტერესებული და პასუხისმგებელი პირის მონაწილეობით."

ზაუტაშვილის განცხადებით მისთვის უცნობია ქრონომეტრაჟის შემცირების მიზეზი:

"ძალიან საზიანო იქნება გადაცემისთვის. მე მინდოდა საათ-ნახევარი ყოფილიყო ეთერი, რატომღაც მენეჯმენტის გადაწყვეტილებით ასე მოხდა. "

საზოგადოებრივი მაუწყებლის მენეჯმენტის ახალი სამოქმედო გეგმის მიხედვით, პირველ არხზე, 2017 წლის 17 ივლისიდან, მოამბის გარდა, ყველა გადაცემა დაიხურა. როგორც ბორდის წევრებმა განაცხადეს, 2017 წლის სექტემბრიდან ეთერში დაბრუნდებოდნენ პროგრამული პრიორიტეტების შესაბამისად, კონკურსის წესით შერჩეული ახალი გადაცემები. კონკურსის შედეგები 21 ივნისს გახდა ცნობილი, თუმცა, გადაცემა ეთერში 7 თვის შემდეგ ბრუნდება.