NBA-ის ერთ-ერთი გუნდის, დალას მავერიკსის მფლობელის განცხადებით, მომავალი სეზონიდან მისი გუნდი ბილეთებს კრიპტოვალუტაშიც გაყიდის. ამის შესახებ მან Bloomberg-ს განუცხადა და მოგვიანებით ტვიტერის გვერდზეც დაადასტურა. დალას მავერიკსი ბილეთების გაყიდვას ბიტკოინსა და ეთირიუმში გეგმავს. ნებისმიერ მსურველს, რომელიც მავერიკსის თამაშზე დასწრებას გადაწყვეტს, ონლაინ რეჟიმში შეეძლება ბილეთების ყიდვა. ამას გარდა, გაყიდვები იგეგმება სეზონურ აბონიმენტზეც.

დალას მავერიკსის მფლობელი ჯერ კიდევ ივნისში წერდა, რომ კრიპტოვალუტა ბუშტი იყო და მალე გასკდებოდა, თუმცა ამის პარალელურად ინვესტიციებსაც ახორციელებდა. როგორც ჩანს მისი პოზიცია შეიცვალა. ახლა მარკ კუბენი ამბობს, რომ კრიპტოვალუტაში დიდ მომავალს ხედავს და ამიტომაც სურს თავის ბიზნესში მისი ინტეგრირება.

დალას მავერიკსი არ არის ერთადერთი გუნდი, რომელიც კრიპტოვალუტას იღებს. NBA-ის კიდევ ერთი გუნდი, საკრამენტო კინგსი, უკვე ყიდის ბილეთებს კრიპტოვალუტაში.