შინაგან საქმეთა სამინისტროს განცხადებით, გიორგი გახარიასა და თურქეთის შინაგან საქმეთა მინისტრს სულეიმან სოილუს შორის სატელეფონო საუბრის შედეგად მხარეები თურქეთის საზღვრის კვეთასთან დაკავშირებით შეთანხმდნენ.

უწყების განცხადებით, 2018 წლის პირველი იანვრიდან ამოქმედებულ რეგულაციებთან დაკავშირებით საქართველოსა და თურქეთის შესაბამისი უწყებები გააგრძელებენ კონსულტაციას, რომლის დასრულებამდეც ახალი წესები საქართველოს მოქალაქეებზე არ გავრცელდება.

ასევე, შსს-ს ცნობით, მხარეებმა ისაუბრეს იმაზეც, რომ საქართველოში თურქეთის რესპუბლიკის შინაგან საქმეთა მინისტრის დაგეგმილი ვიზიტისას განიხილავენ თანამშრომლობის საკითხებს, მათ შორის საზღვრის კვეთასთან დაკავშირებით.

დღეს, 16 იანვარს, სარფში საპროტესტო აქცია გაიმართა. აქციის მონაწილეების თქმით, ახალი რეგულაციის გამო ისინი თურქეთში სამუშაო ადგილებს დაკარგავენ.

თურქეთმა უცხო ქვეყნის მოქალაქეებისთვის, ტერიტორიაზე შესვლის სიხშირის კონტროლი გააკაცრა.

პირველი იანვრიდან საზღვრის თუნდაც 1 საათით გადაკვეთა და უკან დაბრუნება მოქალაქეს ერთდღიან ვიზიტში ჩაეთვლება. ინფორმაციას აჭარის ტელევიზია ავრცელებს.

აქამდე არსებული წესით რამდენიმე საათით საზღვარის კვეთა არ ითვლებოდა ერთდღიან ვიზიტად და შესაბამისად არ აკლდებოდა უვიზოდ სარგებლობის 90 დღიან უფლებას.

ახალი რეგულაციით, 90-ჯერ საზღვრის კვეთის შემთხვევაში, მოქალაქეს ოფიციალური ბინადრობის უფლების მოპოვება დაჭირდება.

აღნიშნული გადაწყვეტილება ვრცელდება თურქეთის ყველა გამტარ პუნქტზე და ეხება ყველა უცხო ქვეყნის მოქალაქეს.