ამერიკის შეერთებული შტატების დედაქალაქში იმ ქუჩას, სადაც რუსეთის საელჩოა განთავსებული, მოკლული რუსი ოპოზიციონერის, ბორის ნემცოვის სახელი დაარქვეს.

ბორის ნემცოვი მოსკოვში, კრემლთან ახლოს, 2015 წლის 27 თებერვალს უცნობმა პირებმა მოკლეს. მოგვიანებით, მისი მკვლელობის ბრალდებით წარმოშობით ჩეჩენი რუსეთის მოქალაქეები გაასამართლეს. პუტინის მოკლული ოპონენტის ოჯახის წევრები აღნიშნულს არასაკმარისად მიიჩნევენ, რადგან, მათი აზრით, გამოძიებას დამკვეთი არ გამოუვლენია.

ვაშინგტონის ქალაქის საბჭოს განცხადებით, ქუჩისთვის ნემცოვის სახელის მინიჭების მიზანი დემოკრატიის მოკლული აქტივისტის ხსოვნისთვის პატივისცემაა.

როგორც BBC წერს, ვაშინგტონის გადაწყვეტილებამ რუსეთის პოლიტიკური ელიტის გულისწყრომა გამოიწვია. მათ აშშ რუსეთის შიდა საქმეებში ჩარევასა და ბინძური ტრიუკების განხორციელებაში დაადანაშაულეს.