სახელმწიფო უსაფრთხოების სამსახურმა ტერორიზმის საქმეზე პანკისსა და ისანში ჩატარებული სპეცოპერაციის დროს დაკავებულებისა და გარდაცვლილების კავშირის დასადასტურებლად ვიდეომასალა გაასაჯაროვა. პრესკონფერენცია სუს-ში დღეს, 4 იანვარს, ადმინისტრაციის ხელმძღვანელმა ნინო გიორგობიანმა გამართა.

სუს-ის განცხადებით, ვიდეოკადრებში ჩანს, თუ როგორ გადაადგილდებიან თბილისში ისნის სპეცოპერაციისას დაკავებული შოაიფ ბორზიევი, ასევე ასლანბეგ სოლტახმადოვი, თემირლან მაჩალიკაშვილთან ერთად.

ნინო გიორგობიანმა ბრიფინგზე თქვა, რომ გამოძიებით დადგენილია დაკავებულთა კავშირები ახმედ ჩატაევთან და ტერორიზმში ბრალდებულ სხვა წევრებთან.

უწყების მტკიცებით, გაბრიელ სალოსის ქუჩაზე მდებარე ბინიდან ამოღებულია თემირლან მაჩალიკაშვილის საბანკო ხელშეკრულება, სადაც ადგილობრივი რეკვიზიტების გარდა მითითებულია სამი უცხოური საბანკო რეკვიზიტი:

"შოაიპ ბორზიევის დაკავებისას ამოღებული მობილური ტელეფონის დათვალიერებისას აღმოჩენილია თემირლან მაჩალიკაშვილზე გაფორმებულ საბანკო ხელშეკრულებაზე გადაღებული ფოტო".

გამოძიების ვერსიით, დაკავებული ზურაბ გორნაკაშვილი პირადად ჩავიდა თურქეთში ახმედ ჩატაევისა და მისი დაჯგუფების წევრების დასახმარებლად:

"მან ისინი მანქანით მიიყვანა თურქეთ- საქართველოს საზღვართან. გორნაკაშვილი თბილისშიც ეხმარებოდა ახმეტ ჩატაევს. დადგენილია რომ დაკავებული რუსლან ალდამოვი ბაადურ ჩოფანაშვილთან, რამაზ მარდოშვილთან და თემირლან მაჩალიკაშვილთან ერთად უშუალოდ ხელმძღვანელონდა ახმედ ჩატაევისა და მისი დაჯგუფების წევრების საქართველოში შემოყვანას, მათ დაბინავებასა და საკვებითა და მობილური ტელეფონებით მომარაგებას".

პანკისის ხეობაში სპეცოპერაცია 26 დეკემბერს ჩატარდა. სპეცოპერაციის დროს სამართალდამცავებმა ერთ-ერთი ბრალდებული თემირლან მაჩალიკაშვილი თავში დაჭრეს, რომელიც დღემდე საავადმყოფოშია და სამკურნალოდ, მისი ევროპაში გადაყვანის საკითხს განიხილავენ.

თემირლან მაჩალიკაშვილის ევროპაში გადასაყვანად ჯანდაცვის სამინისტრო მოლაპარაკებებს მართავს

პანკისში სპეცოპერაციისას სპეცრაზმის მიერ უფლებამოსილების შესაძლო გადამეტებაზე გამოძება დაიწყო

გამოძიება 331-ე პრიმა მუხლის მესამე ნაწილით მიმდინარეობს, რაც ტერორიზმის დაფინანსებას, ტერორისტული საქმიანობის სხვაგვარ მატერიალურ მხარდაჭერას ან რესურსებით უზრუნველყოფას გულისხმობს, რამაც მძიმე შედეგი გამოიწვია. სასჯელის ზომად 17-დან 20 წლამდე ვადით ან უვადო თავისუფლების აღკვეთას ითვალისწინებს.

21-22 ნოემბრის ისნის სპეცოპერაციის შედეგად, რომელიც დაახლოებით 20 საათის განმავლობაში მიმდინარეობდა, დაიღუპა ერთი სპეცრაზმელი და დაიჭრა ოთხი სამართალდამცავი. სახელმწიფო უსაფრთხოების სამსახურის ცნობით, ლიკვიდირებულია დანაშაულებრივი ჯგუფის სამი წევრი. ლიკვიდირებულთაგან ერთ-ერთი ახმედ ჩატაევია.