ავიაციის უსაფრთხოების ქსელმა სტატისტიკური მონაცემები გამოაქვეყნა, რომლის თანახმად 2017 ყველაზე უსაფრთხო წლად დასახელდა, მკვეთრად მცირე ავიაკატასტროფების რაოდენობის გამო.

ავიაციის სტატისტიკის თანახმად, გასულ წელს ჯამში 10 უბედური შემთხვევა მოხდა, რომელთაგან 5 სატვირთო, 5 კი სამგზავრო ავიალაინერი იყო. შედეგად, სულ 79 ადამიანი დაიღუპა, მაშინ როდესაც 2016 წლის 16 შემთხვევას 303 ადამიანის სიცოცხლე ემხვერპლა.

ორგანიზაციის სტატისტიკა მოიცავს მსოფლიოს მასშტაბით მომხდარ ყველა კომერციული თვითმფრინავის (როგორც სამგზავრო, ისე სატვირთო) ფატალურ ინციდენტს. მათ შორის, ისეთ სამოქალაქო თვითმფრინავებსაც, რომლებიც 14 და მეტი მგზავრის გადაყვანისთვისაა განკუთვნილი.

შესაბამისად, მონაცემებს შორის არ არის 7 ივნისის მიანმარის საჰაერო ძალების თვითმფრინავის კატასტროფა, რასაც 122 ადამიანი ემსხვერპლა.

კომერციულთან ერთად, სამხედრო და სხვა არაკომერციული თვითმფრინავების უბედური შემთხვევების ჩათვლით, 2017 წლის ავიაკატასტროფების რაოდენობა 24-მდე, მსხვერპლთა კი 230-მდე გაიზარდა. ავიაციის უსაფრთხოების ქსელის შეფასებით, მიღებული შედეგი მაინც ყველაზე დაბალი მაჩვენებელია თანამედროვე ავიაციის ისტორიაში.

2017 წლის ყველაზე სერიოზული ავიაკატასტროფა, იანვარში, თურქულმა სატვირთო თვითმფრინავმა ყირგიზეთის ერთ-ერთ სოფელთან განიცადა. შედეგად კი, ეკიპაჟის ოთხივე წევრი ბორტზე და 35 ადამიანი ხმელეთზე დაიღუპა.

ავიაციის უსაფრთხოების ქსელის შეფასებით, ავიაკატასტროფებისას სიკვდილიანობა ბოლო 20 წელია მცირდება. 2005 წელს, 1000-ზე მეტი ადამიანი ემსხვერპლა კომერციული ავიახაზების თვითმფრინავების კატასტროფებს, მსოფლიოს მასშტაბით.