მთავრობის სხდომაზე პრემიერ-მინისტრმა გიორგი კვირიკაშვილმა განაცხადა, რომ 2018 წლიდან ამოქმედდება პეტიციების ვებპორტალი, ichange.gov.ge. დღეს, მთავრობა განახლებული შემადგენლობით პირველ სხდომას ატარებს.

"[ვებპორტალი] მოქალაქეებს მისცემს საშუალებას, რომ ღიად, ელექტრონული წესით დააფიქსირონ საკუთარი ინიციატივები, მხარი დაუჭირონ მათთვის საინტერესო ინიციატივებს და ათი ათასი ხელმოწერის შეგროვების შემთხვევაში, ხელისუფლებას ექნება ვალდებულება, განიხილოს ეს პეტიცია და პასუხი აცნობოს ხელმომწერთ", - განაცხადა პრემიერმა.

პრემიერმა, ასევე, აღნიშნა, რომ საქართველოს მთავრობა ერთ-ერთ ყველაზე ღია და გამჭვირვალე მთავრობად იქნა მიჩნეული ღია მმართველობის პარტნიორობის წევრ ქვეყნებს შორის. საქართველო პირველად გახდა ღია მმართველობის პარტნიორობის - OGP-ის თავმჯდომარე ქვეყანა.