შინაგან საქმეთა სამინისტროს გენერალური ინსპექციის მტკიცებით, კახეთში, სოფელ ქისტაურში მოქალაქის საცხოვრებელი სახლის ჩხრეკის დროს ქალის ჯანმრთელობის გაუარესება თავის ტვინში სიმსივნის ზრდამ გამოიწვია. უწყების განცხადებით, ამ ინციდენტის დაკავშირება ჩხრეკასთან არ შეიძლება:

"პირველადი ინფორმაცია იმის შესახებ, თითქოს დავით ხოსიაშვილის რძლის, თ.შ.-ს ჯანმრთელობის მდგომარეობა დაკავშირებულია ჩატარებულ საგამოძიებო მოქმედებასთან, ამ ეტაპზე არ შეიძლება ჩაითვალოს რელევანტურად, რადგან სამედიცინო კვლევებით დადასტურებულია, რომ მოქალაქე თ.შ.-ს თავის ტვინში აღენიშნება მრავლობითი სიმსივნური წარმონაქმნი."

გენერალური ინსპექციის განცხადებით, ჩხრეკა მიმდინარეობდა ყოველგვარი იძულებისა და ძალადობის გარეშე:

"იმავე დღეს მოხდა საქმეზე მოქალაქე დავით ხოსიაშვილისა და მისი ოჯახის წევრების მოწმის სახით გამოკითხვა, რა დროსაც მათ აღნიშნეს, რომ ჩატარებულ ჩხრეკასთან დაკავშირებით არანაირი პრეტენზია გააჩნიათ."

შსს ავრცელებს ჩხრეკის პროცესის ნაწილის ამსახველ ვიდეო მასალასაც, თუმცა მასში ქალის შეუძლოდ გახდომის მომენტი საერთოდ არ ჩანს.

როგორც დავით ხოსიაშვილმა რეგინფოს უთხრა, ჩხრეკის დროს მისი რძალი შიშისგან ავად გახდა, დავარდა და ფეხზე ვეღარ ადგა:

"ბავშვი ტიროდა. ვიდრე ჩვენ რძლის მოსულიერებას ვცდილობდით, პოლიციელები იცინოდნენ. ამბობდნენ, რომ ჩემი რძალი ავადმყოფობას იგონებდა... ექიმებმა გვითხრეს, რომ მდგომარეობა მძიმეა, თავში კაპილარი აქვს გაწყვეტილი, რამაც სისხლის გაჟონვა გამოიწვია. გადარჩება თუ არა, არვიცით".