თბილისის მერიას 2018 წლის ახალი წლის მისალოცი ვიდეოს დამზადება 115 187 ლარი უჯდება. 40-წამიანი ვიდეორგოლის დასამზადებლად ტენდერი არ გამოცხადებულა, ხელშეკრულება შპს ბეთერ ფლაი-სთან დაიდო. კომპანის დირექტორი და 100 პროცენტიანი წილის მფლობელი დავით ჯაშია. ჯაშმა ქართულ ოცნებას 2016 წელს 60 ათასი ლარი შესწირა.

სარეკლამო რგოლი უკვე გამოჩნდა თბილისის მერიის ფეისბუკგვერდზე. როგორც მერიის პრესსამსახურში ამბობენ, თბილისის ბიუჯეტით დამზადებულ ვიდეორგოლს "თბილისის მერია გილოცავთ ახალ წელს" საზოგადოებრივი მაუწყებლისა და იმედის მაყურებლები ნახავენ. მათივე ინფორმაციით, მოლაპარაკებები მიმდინარეობს ტელეკომპანია რუსთავი 2-თანაც.

აღნიშნული შესყიდვის შესახებ ინფორმაცია თავდაპირველად ლიბერალმა გაავრცელა.