ჩიკაგოში არსებული Cboe Global Markets გახდა პირველი საფონდო ბირჟა, რომელიც ბიტკოინების ფიუჩერსებს გაყიდის. ისტორიაში პირველი საფონდო ვაჭრობა მსოფლიოში ყველაზე პოპულარულ კრიპტავალუტაზე ჩიკაგოს ბირჟამ რვა დეკემბრის ღამით დაიწყო.

ვაჭრობის დაწყებიდან მალევე, საფონდო ბირჟამ ორჯერ შეაჩერა ვაჭრობა ფასების მაღალის ცვალებადობის გამო. საფონდო ბირჟას აქვს ვაჭრობის შეჩერების უფლება ორი წუთით, თუ ფასის ცვლილებამ 10 პროცენტს გადააჭარბა ხოლო, 20-პროცენტიანი ცვლილებისას ბირჟას შეუძლია ვაჭრობა 10 წუთით შეაჩეროს. პრობლემები შეექმნა ასევე საფონდო ბირჟის ვებსაიტს, რომელიც ორჯერ გაითიშა და ვერ ემსახურებოდა მომხმარებლებს მაღალი დატვირთვის გამო.

ბიტკოინის პირველი დღე ბირჟაზე სასარგებლო აღმოჩნდა ვალუტისთვის და მისი ფასი 25 პროცენტით გაიზარდა. ფიუჩერსი წარმოადგენს ერთგვარ სანაძლეოს გამყიდველსა და მყიდველს შორის. კონტრაქტში გაწერილია აქტივის ფასი და რაოდენობა. თუ ფასი შეთანხმების დადასტურების შემდეგ გაიზარდა, აქტივის მყიდველი მოგებულია, თუ კი ფასმა დაიწია, გამარჯვებული აქტივის გამყიდველია. ფიუჩერსებით ვაჭრობა რომელიმე აქტივზე, იქნება ეს ოქრო, ნავთობი თუ სხვა რამ, ამყარებს ნდობას ინვესტორების მხრიდან იმ აქტივზე, რომელზეც ვაჭრობა მიმდინარეობს. სწორედ ამ კუთხით, ბიტკოინის გასვლა ბირჟაზე, მნიშვნელოვანი იყო კრიპტოვალუტისთვის.

8 დეკემბერს შემდგარი ვაჭრობის შედეგად ბიტკოინის ფიუჩერსებზე ფასები გაიზარდა. 2018 წლის იანვრისთვის აღნიშნულ ბირჟაზე ერთი ბიტკოინი $18 700 ეღირება, თებერვალში კი - $19 200. ამავდროულად, Coinmarketcap.com-ის ინფორმაციით, გაიზარდა უშუალოდ ბიტკოინის ფასიც და $16 900 შეადგინა.

ბაზრის დადებითი რეაქციის შემდეგ ანალიტოკესები კრიპტოვალუტაზე მზარდ მოთხოვნას და მის სტაბილურ ზრდას პროგნოზირებენ. კრიპტოვალუტის ბირჟაზე გასვლა ხელს შეუწყობს სანდოობის ზრდას, ასევე, შესაძლოა, ბიტკოინში ინვესტირებაზე დაფიქრდნენ ის ინვესტორები, რომლებიც თავს იკავებდნენ არარეგულირებულ აქტივში ინვესტირებისგან.