უკრაინის გენერალურმა პროკურორმა იური ლუცენკომ ფეისბუკის ოფიციალურ გვერდზე განცხადება გამოაქვეყნა, სადაც წერია, რომ უკრაინელმა სამართალდამცავებმა, ძებნის შესახებ გამოცემული დადგენილების მიხედვით, კიევში დააკავეს მიხეილ სააკაშვილი.

"დაპირებისამებრ, ეს მოხდა ძალის გამოყენების გარეშე, უსისხლოდ", – წერს ლუცენკო. მისივე ინფორმაციით, სააკაშვილი წინასწარი დაკავების იზოლატორშია მოთავსებული და მისთვის აღკვეთის ღონისძიების შეფარდებაზე მოგვიანებით სასამართლო იმსჯელებს.

მიხეილ სააკაშვილი პირველად 5 დეკემბერს დააკავეს, თუმცა მის სახლთან მობილიზებულმა აქტივისტებმა ის სპეცრაზმისგან დაიხსნეს. სააკაშვილმა 10 დეკემბერს დააანონსა იმპიჩმენტის მარში უკრაინის პრეზიდენტ პოროშენკოს იმპიჩმენტის მოთხოვნით.

საქართველოს მესამე პრეზიდენტი, რომელიც უკრაინაში პოლიტიკურ საქმიანობას ეწევა, მიიჩნევს, რომ უკრაინის ხელისუფლება პოლიტიკური ნიშნით დევნის. თავის მხრივ, უკრაინის ხელისუფლება მას გადატრიალების მცდელობასა და ამ მიზნით ფულის რუსეთისგან მობილიზებაში ადანაშაულებს.