ახალმა სახალხო დამცველმა, რომელიც უფლება-მოსილების შესრულებას დღეს, 8 დეკემბერს, შეუდგა, განაცხადა, რომ ერთ-ერთი პირველი საქმე, რომლითაც დაინტერესდება არასრულწლოვანთა მკვლელობა იქნება:

"მიუხედავად იმისა, რომ სახალხო დამცველის აპარატი მუშაობს დიდი ხანია ბავშვთა უფლებებზე, ალბათ ამ ძალიან ტრაგიკულმა შემთხვევამ კიდევ ერთხელ ძალიან მწვავედ წარმოაჩინა ის პრობლემები, რაც არსებობს ბავშვთა უფლებების თვალსაზრისით, სკოლაში არსებული სიტუაციები. ამიტომ, რა თქმა უნდა, ყველა იმ საქმის შესწავლა, რაც დაკავშირებულია არასრულწლოვანთა შორის ძალადობასთან, იქნება პრიორიტეტი".

მისივე თქმით, სამოქალაქო და პოლიტიკურ უფლებებთან ერთად, მისთვის პრიორიტეტი სოციალურ-ეკონომიური უფლებებიც იქნება:

"ვაპირებ, რომ განსაკუთრებით გავაძლიერო ბავშვთა უფლებების მიმართლებით სახალხო დამცველის საქმიანობა, ასევე, ქალთა უფლებების დაცვა და შშმ პირთა უფლებების დაცვა. ვაპირებ, რომ გაძლიერდეს სახალხო დამცველის მუშაობა ჯანსაღ გარემოში ცხოვრების უფლების მიმართებით".

ნინო ლომჯარიამ სახალხო დამცველი თანამდებობაზე უჩა ნანუაშვილი შეცვალა. პარლამენტმა ის 96 ხმით ხუთის წინააღმდეგ დაამტკიცა და აღნიშნულ პოსტს ხუთი წლის ვადით დაიკავებს. მანამდე, 2016 წლის ნოებრიდან 2017 წლის სექტემბრამდე იყო გენერალური აუდიტორის პირველი მოადგილე.

ნინო ლომჯარია აღნიშნულ პოსტზე საპარლამენტო უმრავლესობამ წარადგინა. მისი კონკურენტი პატრიოტთა ალიანსის კანდიდატი გიორგი ფოფხაძე იყო. საპარლამენტო უმცირესობას პროცესში მონაწილეობა არ მიუღია, რადგან მიიჩნია, რომ ლომჯარიას კანდიდატურის შერჩევა გაუმჭვირვალე იყო.