საქართველოს პარლამენტმა ნინო ლომჯარია სახალხო დამცველად 96 ხმით ხუთის წინააღმდეგ დაამტკიცა. ლომჯარია აღნიშნულ პოსტს ხუთი წლის ვადით დაიკავებს. ნინო ლომჯარია აღნიშნულ პოსტზე საპარლამენტო უმრავლესობამ წარადგინა. მისი კონკურენტი პატრიოტთა ალიანსის კანდიდატი გიორგი ფოფხაძე იყო. საპარლამენტო უმცირესობას პროცესში მონაწილეობა არ მიუღია, რადგან მიიჩნია, რომ ლომჯარიას კანდიდატურის შერჩევა გაუმჭვირვალე იყო.

საქართველოს მოქმედ სახალხო დამცველს, უჩა ნანუაშვილს უფლებამოსილება 7 დეკემბერს ეწურება, რის შემდეგაც მოვალეობის შესრულებას ნინო ლომჯარია შეუდგება.

ნინო ლომჯარიას ბიოგრაფია

ნინო ლომჯარიამ დაამთავრა ივანე ჯავახიშვილის სახელობის თბილისის სახელმწიფო უნივერსიტეტი სამართალმცოდნეობის სპეციალობით, ასევე სენტ-ლუისის (აშშ) ვაშინგტონის სახელობის უნივერსიტეტის სამაგისტრო პროგრამა.

2016 წლის ნოებრიდან 2017 წლის სექტემბრამდე იყო გენერალური აუდიტორის პირველი მოადგილე. სამართლიანი არჩევნებისა და დემოკრატიის საერთაშორისო საზოგადოებაში (ISFED) 2016 წელს იყო იურიდიული და საარჩევნო კონსულტანტი. ამავე ორგანიზაციაში 2011-2015 წლებში აღმასრულებელი დირექტორის თანამდებობას იკავებდა.

2015-2016 წლებში ევროპული სადამკვირვებლო ორგანიზაციების ქსელში (ENEMO) ეკავა გენერალური მდივნის თანამდებობა.

2003-დან 2010 წალმდე ახალგაზრდა იურისტთა ასოციაციაში სხვადასხვა დროს იყო იურიდიული დახმარების ცენტრის ასისტენტი, იურისტი და საარჩევნო პროექტების კოორდინატორი.