უკრაინის პრეზიდენტმა პეტრო პოროშენკომ განაცხადა, რომ მზადაა ნადეჟდა სავჩენკოს განთავისუფლების სანაცვლოდ რუსეთს უკრაინაში დაკავებული სამხედრო ტყვე გადასცეს. ამის შესახებ რადიო თავისუფლება წერს.

პატიმრების გაცვლის შესაძლებლობაზე პოროშენკომ 9 მარტს, ანკარაში თურქეთის პრეზიდენტ რეჯეფ თაიფ ერდოღანთან შეხვედრის წინ განაცხადა:

"მე თუ მკითხავთ, გაცვლა შესაძლებელია. პირველად გამოვიყენებდი ჩემს კონსტიტუციურ უფლებას და ამაზე თანხმობას განვაცხადებდი".

უკრაინის პრეზიდენტმა დასძინა, რომ რუსეთისგან ამ ინიციატივაზე დამაკმაყოფილებელი პასუხი არ მიუღია.

ნადეჟდა სავჩენკო 2014 წლის ივნისში ლუგანსკში ტყვედ ჩაიგდეს და მოსკოვში გაიტაცეს. მას ბრალად რუსი ჟურნალისტების მკვლელობა ედება. მოსკოვის სასამართლო უკრაინის რადისა და ევროსაბჭოს საპარლამენტო ასამბლეის წევრი სავჩენკოს იმუნიტეტს არ აღიარებს და მის გათავისუფლებაზე უარს ამბობს. 2015 წლის 16 სექტემბერს ნადეჟდას კიდევ ნახევარი წლით გაუგრძელეს წინასწარი პატიმრობა.

ამ დროის განმავლობაში სავჩენკო ბრალდებას უარყოფს და ამტკიცებს, რომ მის ირგვლივ განვითარებული პროცესებს პოლიტიკური სარჩული აქვს. მისი განმარტებით, 2014 წლის ივნისში აღმოსავლეთ უკრაინაში მას შემდეგ შეიპყრეს, რაც რუსი ჟურნალისტები უკვე დახოცილები იყვნენ.

ვითარება რუსეთსა და უკრაინას შორის 2014 წელს მოსკოვის მიერ ყირიმის ანექსიის შემდეგ განსაკუთრებით დაიძაბა.