განათლების მინისტრი, მიხეილ ჩხენკელი ხორავას ქუჩაზე მომხდარი არასრულწლოვნების დაპირისპირების შესახებ განცხადებას ავრცელებს. მინისტრი წერს, რომ სამინისტრო გამოძიებასთან თანამშრომლობს და ასევე სკოლის პერსონალიც შეუწყობს ხელს სიმართლის დადგენას:

"ორშაბათს დილიდან მოსწავლეებთან სამუშაოდ სკოლაში მივა ჩვენი ფსიქოლოგების ჯგუფი. მივმართავთ ყველა სხვა საშუალებას სამომავლოდ მსგავსი ტრაგედიის თავიდან ასაცილებლად.

მთელ ჩვენს საზოგადოებასთან ერთად, გულის სიღრმემდე შემძრა ხორავას ქუჩაზე დატრიალებულმა ტრაგედიამ. უპირველეს ყოვლისა, ამ მძიმე წუთებში თანადგომას ვუცხადებ გარდაცვლილი მოსწავლის მშობლებსა და ახლობლებს. ექიმები ძალისხმევას არ იშურებენ და იმედი გვაქვს, მოხერხდება მძიმედ დაჭრილი მოსწავლის სიცოცხლის გადარჩენა".

საქართველოს განათლებისა და მეცნიერების სამინისტროს განცხადებით, ფსიქოლოგები თბილისის 51-ე საჯარო სკოლის მოსწავლეებთან, მათ მშობლებთან, მეურვეებთან თუ კანონიერ წარმომადგენლებთან 24 საათიან რეჟიმში იმუშავებენ.

თბილისში, ხორავას ქუჩაზე არასრულწლოვნებს შორის დაპირისპირების შედეგად დაჭრილი სკოლის მოსწავლე საავადმყოფოში მისვლამდე გარდაიცვალა. შსს-ს ცნობით, ცივი იარაღით დაჭრილი მეორე არასრულწლოვანი საავადმყოფოშია გადაყვანილი და ამ დრომდე მძიმე მდგომარეობაშია.

მომხდარ ფაქტთან დაკავშირებით გამოძიება თბილისის პოლიციის დეპარტამენტმა განზრახ მკვლელობის მუხლით დაიწყო.