მოქალაქე მაგდა კალანდაძემ, რომელმაც ინფორმაცია იმასთან დაკავშირებით გაავრცელა, რომ ციციშვილის სახელობის ბავშვთა ახალ კლინიკაში სამედიცინო პერსონალის არაპროფესიონალიზმს რამდენიმე მცირეწლოვანი ბავშვების სიცოცხლე ემსხვერპლა, On.ge-ს განუცხადა, რომ აპირებს საავადმყოფოს წინააღმდეგ პროკურატურას მიმართოს:

"ვაპირებ, გავიარო იურისტებთან კონსულტაცია და მივმართო პროკურატურას. ამ ეტაპზე სხვას ვერაფერს გეტყვით".

მისი განმარტებით, Facebook-ზე მას რამდენიმე ადამიანი დაუკავშირდა, რომლებმაც ან დაუდასტურეს მისივე გავრცელებული ინფორმაცია და აღნიშნეს, რომ თავად შეესწრნენ ამ ფაქტებს ან ექიმებისა და ექთნების არაპროფესიონალიზმის სხვა შემთხვევები უამბეს მას.

26 ივნისს მაგდა კალანდაძემ თავის Facebook გვერდზე დაწერა, რომ ციციშვილის სახელობის ბავშვთა ახალ კლინიკაში, სამედიცინო პერსონალის არაპროფესიონალიზმისა და დაუდევრობის გამო, 2 მცირეწლოვანი ბავშვი გარდაიცვალა, ერთი კი მძიმედ დაშავდა.

აღნიშნული ინფორმაციის გავრცელებისთანავე On.ge დაუკავშირდა ციციშვილის ბავშვთა ახალი კლინიკის საზოგადოებასთან ურთიერთობის დეპარტამენტს, სადაც დაგვპირდნენ, რომ როგორც კი წაიკითხავდნენ მაგდა კალანდაძის პოსტს, ჩვენს შეკითხვებს აღნიშნულ ფაქტებთან დაკავშირებით უპასუხებდნენ, თუმცა მას შემდეგ ჩვენს ზარებს აღარ პასუხობენ.

დღეს კი ციციშვილის კლინიკამ გაავრცელა ინფორმაცია, რომ მაგდა კალანდაძის მონათხრობი სიმართლეს არ შეესაბამება:

"ეს ალბათ იმიტომ ხდება, რომ დაუსჯელი რჩება ყოველი მსგავსი სკანდალი და ცრუ ბრალდება. თქვენ მიერ მოყვანილი ფაქტების გადამოწმება მარტივად შეიძლება მომხდარიყო, ადგილობრივ ადმინისტრაციასთან კონტაქტით, ან ჯანდაცვის სამინისტროში განცხადების შეტანით, ან სამართალდამცავ ორგანოებში განცხადებით, თუ მართლა შეგტკივათ გული ჩვენს პაციენტებზე".