"ამ აქციის მესიჯი მიღებულია და მიღებულია არა მხოლოდ იმიტომ, რომ ფლეშ მობის მსგავსი აქცია ჩატარდა, არამედ იმიტომ, რომ ეხმაურება მთელი წინასაარჩევნო პერიოდის განმავლობაში ყველაზე მთავარ, აქტუალურ საკითხს. ესაა ჰაერის დაბინძურება, რომლის გამომწვევი სხვადასხვა რამეა", - ამის შესახებ თბილისის მერის მოადგილემ, მაია ბითაძემ გადაცემაში აქტუალური თემა მაკა ცინცაძესთან ერთად სტუმრობისას განაცხადა.

"აქცია შეიძლება ორ ჭრილში განვიხილოთ, როგორც სახალისო და ძალიან აქტუალური".

29 ნოემბერის დილით თბილისში ძეგლების ნაწილი მოქალაქეებს პირბადით დახვდათ. თბილისის ვიცე-მერმა ირაკლი ხმალაძემ განაცხადა, რომ მერია ამას არ მიესალმება და აღნიშნულ ფაქტს ძეგლების შეურაცხყოფა უწოდა. ხმალაძის თქმით, ეს არის საზოგადოების შეურაცხყოფა, ვინაიდან პატივსაცემი ძეგლები არის აღჭურვილი პირბადეებით.

"სოციალურ აქტს თავის თავზე იღებენ ჟანგბადის ნინძები", - ამ სახის ანონიმური წერილი მიიღო On.ge-მ დღეს, 29 ნოემბერს. სოციალური კამპანიის ავტორები ქალაქში სუფთა ჰაერს მოითხოვენ და აცხადებენ, რომ მათი ამგვარი აქტივობა მხოლოდ დასაწყისია.