TV პირველის თქმით, სპეცოპერაციის დროს დაკავებული საედ დუდაევია. ამის შესახებ ინფორმაცია მათ სააპელაციო სასამართლოს პრესსამსახურის წარმომადგენელმა დაუდასტურა:

"საედი დუდაევის საქმე არის შემოსული. დუდაევის საქმე არის ჩვენთან ტერორისტულ საქმიანობასთან დაკავშირებით".

კითხვაზე ოფიციალური უწყებებისგან განსხვავებით რატომ გადაწყვიტა საკონსტიტუციომ ბრალდებულის ვინაობის გამჟღავნება, მათ თქვეს, რომ სასამართლოს ვინაობა არ გაუმჟღავნებია და ტელევიზიებმა სახელითა და გვარით თვითონ მიმართეს.

ისნის სპეცოპერაციის დროს დაკავებულს, დახურულ სხდომაზე, აღკვეთის ღონისძიებად პატიმრობა 24 ნოემბერს შეეფარდა. ბრალდებულის ადვოკატის, იმედა ქარქაშაძის თქმით, გადაწყეტილება მათ დღეს, 27 ნოემბერს გაასაჩივრეს.

ტერორიზმში ბრალდებული პირის ვინაობას, მის სახელსა და გვარს არც მისი ადვოკატი და არც პროკურორები ამხელენ. თუმცა ცნობილია მისი ინიციალები - ს.დ. რუსთავი 2-ის ინფორმაციით, დაკავებული პირი ლაფანყურის სპეცოპერაციასთან დაკავშირებული სუხო დუდაევია.

ომბუდსმენის, უჩა ნანუაშვილის თქმით, სახალხო დამცველის წარმომადგენელმა სპეცოპერაციის დროს დაკავებული მოინახულა. მისი განმარტებით, ის უარყოფს ტერორიზმთან კავშირს, თუმცა აღიარებს ცეცხლსასროლი იარაღის ფლობას:

"ის ასევე ამბობს, რომ არ იცნობდა იმ ადამიანებს, რომელთა წინააღმდეგაც განხორციელდა სპეცოპერაცია. მხოლოდ ერთ ადამიანს იცნობდა".

თბილისში, ისანში, ბერი გაბრიელ სალოსის ქუჩაზე, 21-22 ნოემბრის სპეცოპერაციის შედეგად, დაიღუპა ერთი სპეცრაზმელი და დაჭრილია ოთხი სამართალდამცავი. სახელმწიფო უსაფრთხოების სამსახურის ცნობით, ლიკვიდირებულია დანაშაულებრივი ჯგუფის სამი წევრი, ერთი კი დაკავებულია. გამოძიება სიხლის სამართლის კოდექსის 3231-ე მუხლის პირველი ნაწილითა და 328-ე მუხლით მიმდინარეობს, რაც ტერორზმთან დაკავშირებული მუხლებია.