ბათუმში, სასტუმრო ლეოგრანდში გაჩენილ ხანძარს ოთხი ადამიანის სიცოცხლე შეეწირა. ამის შესახებ ინფორმაციას აჭარის ტელევიზია ავრცელებს.

ტელევიზია სასწრაფო სამედიცინო ცენტრზე დაყრდნობით აცხადებს, რომ ადამიანების გარდაცვალების მიზეზი დამწვრობა არ ყოფილა, არამედ, სავარაუდოდ, ინტოქსიკაცია. მათი იდენტიფიკაცია კი ვერ ხდება, რადგან თან პირადობის დამადასტურებელი დოკუმენტები არ ჰქონიათ.

რაც შეეხება დაშავებულებს, მათი რიცხვი 10-მდეა და ისინი საავადმყოფოში არიან გადაყვანილნი. მათგან არც ერთს არ აქვს დამწვრობა.

შინაგან საქმეთა სამინისტროს ცნობით, ადგილზე მობილიზებულია აჭარის საგანგებო სიტუაციების მართვის სამმართველოს 12 სახანძრო-სამაშველო მანქანა და 100-მდე მეხანძრე-მაშველი. ინტენსიურად მიმდინარეობს ცეცხლის ქრობის პროცესი. დამატებითი სახანძრო-სამაშველო ჯგუფები უახლოეს წუთებში ჩაერთვებიან გურიის, სამეგრელოს და იმერეთის რეგიონებიდან:

"პირველადი ინფორმაციით, ცეცხლი შენობის ზედა სართულზე გაჩნდა. ძლიერი დაკვამლიანების გამო, მოქალაქეთა ევაკუაცია რთულად მიმდინარეობს."

ბათუმის მერის, ლაშა კომახიძის განცხადებით, ლეოგრანდიდან დამსვენებლები სხვა სასტუმროებში გადაიყვანენ:

''სამწუხაროდ, არიან გარდაცვლილები, სასტუმროს სხვა დამსვენებლები გადაგვყავს სხვა სასტუმროებში."