აშშ-ს ელჩმა საქართველოში, იან კელიმ თბილისში, გაბრიელ სალოსის ქუჩაზე მიმდინარე სპეცოპერაციის შესახებ ჟურნალისტებს უთხრა, რომ პირველ რიგში, მოსახლეობის უსაფრთხოებაა გასათვალისწინებელი:

"ყველაზე მეტად მოსახლეობის უსაფრთხოება გვაღელვებს. ყურადღებით ვაკვირდებით პროცესს და ვიცით, რომ ის გარკვეული ზომები მოსახლეობის უსაფრთხოებისთვის მიღებულია და ეს ძალიან მნიშნველოვანია. აქ ორი საკითხია ხაზგასასმელი - პირველი, რომ გარანტირებული უნდა იყოს ადამიანების უსაფრთხოება, მეორე, როდესაც სპეცოპერაცია დასრულდება, სამართალდამცავმა ორგანოებმა გამჭვირვალედ მიაწოდონ ინფორმაცია მოსახლეობას".

სახელმწიფო უსაფრთხოების სამსახურის ინფორმაციით, ისანში, გაბრიელ სალოსის გამზირზე, სპეცოპერაციისას ერთი პირია დაკავებული, სპეცოპერაცია გრძელდება.

სპეცოპერაცია ბერი გაბრიელ სალოსის გამზირზე გუშინ, 21 ნოემბერს ღამით დაიწყო და ამ დრომდე მიმდინარეობს. ისმის სროლისა და აფეთქების ხმა.