საავტომობილო გზების დეპარტამენტის ინფორმაციით, დარიალის ხეობაში, სადაც მოვარდნილმა ღვარცოფმა საავტომობილო გზის 800-მდე მეტრის მონაკვეთი წაიღო, სტიქიის სალიკვიდაციო სამუშაოები მიმდინარეობს.

დეპარტამენტის ინფორმაციით, მათი თანამშრომლები ამ დროისთვის მდინარე თერგში წყლის დონის დაწევას ელოდებიან, რის შემდეგაც 40-მდე ერთეული მძიმე ტექნიკა უშუალოდ გზის აღდგენით სამუშაოებზე გადავა.

23 ივნისს 18:00 საათზე, მცხეთა–სტეფანწმინდა–ლარსის საავტომობილო გზის დარიალის ხეობაში სტიქიური პროცესების გააქტიურების გამო, კმ134-კმ135 მონაკვეთზე, საშიშ ზონაში აიკრძალა ყველა სახის ავტოტრანსპორტის მოძრაობა.

ძლიერი წვიმების შედეგად, დევდორაკის ხეობიდან მოვარდნილმა ღვარცოფმა გადაკეტა მდინარე თერგის კალაპოტი, რის შედეგადაც მდინარე თერგმა შეიცვალა მიმართულება და მოვარდნილმა წყალმა წაიღო მცხეთა–სტეფანწმინდა–ლარსის საავტომობილო გზის დაახლოებით 800 მეტრიანი მონაკვეთი.

ადგილიდან მოქალაქეები ევაკუირებულნი არიან. სტიქიის სალიკვიდაციო სამუშაოებს შპს სახელმწიფო სამშენებლო კომპანია ახორციელებს.