საქართველოს ეროვნულ ბანკში აღნიშნავენ, რომ გავრცელებული მოსაზრება, თითქოს ბლუმბერგის სისტემაში მხოლოდ ორი ყველაზე მსხვილი ბანკი ვაჭრობს, არასწორია. უწყების განმარტებით, თიბისი ბანკისა და საქართველოს ბანკის წილები ჯამში ბანკთაშორის სავალუტო ბაზარზე ბაზრის საერთო წილის მესამედსაც არ აღემატება.

"საქართველოში სავალუტო ბაზარი ლიბერალიზებულია და საუკეთესო საერთაშორისო პრაქტიკის შესაბამისად, ქვეყანაში სავალუტო შეზღუდვები არ არსებობს. ეს ნიშნავს, რომ ნებისმიერ იურიდიულ თუ ფიზიკურ პირს შეუძლია შეუზღუდავად შეიძინოს ან გაყიდოს ნებისმიერი ვალუტა, ფინანსური შუამავლის მეშვეობით ან მის გარეშე", - განმარტავენ ეროვნულ ბანკში.

მათივე განცხადებით, ფინანსური ინსტიტუტები სავალუტო შემოსავლებს იღებენ კლიენტების დავალებით ვალუტის ყიდვა-გაყიდვის ოპერაციებიდან მიღებული საკომისიოს სახით.

"ვინაიდან საქართველოში დოლარიზაცია ჯერ კიდევ მაღალია, მომხმარებლები ხშირად აკონვერტირებენ ვალუტას, რაც, შესაბამისად, ბანკების მაღალ სავალუტო შემოსავლებს განაპირობებს. დოლარიზაციის შემცირებასთან ერთად ეს მაჩვენებელიც ეტაპობრივად შემცირდება", - აღნიშნულია ეროვნული ბანკის მიერ გავრცელებულ განცხადებაში.

ეროვნული ბანკის ცნობით, ბლუმბერგის სავაჭრო სისტემაში საქართველოდან აშშ დოლარს 16 კომერციული ბანკი და ოთხი მიკროსაფინანსო ორგანიზაცია ყიდულობს და ყიდის. ამ ორგანიზაციების წილები კი ასე ნაწილდება:

ფოტო: ფოტო ვებგვერდიდან / ეროვნული ბანკი

ლარი უცხოურ ვალუტებთან აშშ დოლართან და ევროსთან ბოლო რამდენიმე კვირის განმავლობაში უფასურდება. ერთი ევროს ღირებულებამ 2017 წლის ნოემბერში პირველად გადააჭარბა სამ ლარს.

დღეს, 15 ნოემბერს, ეროვნულ ბანკის კურსით, 1 ევროს ღირებულება 3,1437 ლარია, 1 დოლარის კი - 2,68 ლარი.