ბრიტანეთის პრემიერ-მინისტრმა, ტერეზა მეიმ რუსეთი არჩევნებში ჩარევასა და ჰაკერულ თავდასხმაში დაადანაშაულა. ლონდონის სიტის ერთ-ერთ ღონისძიებაზე გამოსვლისას მეიმ განაცხადა, რომ ვლადიმერ პუტინი "თავისუფალ საზოგადოებას ძირს უთხრის", - წერს BBC.

ბრიტანეთის მთავრობის ლიდერმა თქვა, რომ დასავლეთში უთანხმოების დასათესად რუსეთი ყალბ ახალ ამბებს ავრცელებს. მან განმარტა, რომ მისი გზავნილი პუტინისთვის მარტივია - მან უნდა აირჩიოს სხვა გზა, იმისგან განსხვავებული რასაც მოსკოვი ახლა გადის.

"ევროპის რამდენიმე ქვეყნის საჰაერო სივრცე მოსკოვს არაერთხელ დაურღვევია და მიზანმიმართულად ატარებდა კიბერდანაშაულის კამპანიას. მათ შორის, არჩევნებში ჩარევა და ჰაკერული თავდასხმა დანიის თავდაცვის სამინისტროსა და ბუნდერსტაგზე", - განაცხადა მეიმ.

მთავრობის ლიდერის განცხადებით, ბრიტანეთისა და ევროკავშირის მჭიდრო ეკონომიკური კავშირი რუსეთისთვის შემაკავებელი ძალა გახდება, რათა მან ევროპის წესრიგი არ დაარღვიოს:

"საჭირო ზომებს მივიღებთ, რათა რუსეთის მოქმედებებს შევეწინააღმდეგოთ. მაგრამ ეს არაა ის, რაც ჩვენ რუსეთთან გვსურს. არ გვინდა ცივი ომის პერიოდში დაბრუნება ან მუდმივი კონფრონტაციის მდგომარეობაში ყოფნა".

მომავალ კვირას ბრიტანეთის საგარეო საქმეთა მინისტრი ბორის ჯონსონი რუსეთს პირველი ოფიციალური ვიზიტით ეწვევა. ამ თვის დასაწყისში ჯონსონმა დეპუტატებს განუცხადა, რომ ისე ვერ ხედავს ვერანაირ დამამტკიცებელ საბუთს იმისა, რომ რუსეთი ბრიტანეთის არჩევნებში ან ბრექსიტის რეფერენდუმში ჩაერია.