გაგრძელდება თუ არა სკოლებში ვაშლის დარიგების პროგრამა, ჯანსაღი ცხოვრების პოპულარიზაციის პროექტის ფარგლებში? - ამ კითხვაზე, განათლების ახლადწარდგენილმა მინისტრმა, მიხეილ ჩხენკელმა უპასუხა, რომ ეს სფერო სამინისტროსთვის პრიორიტეტად დარჩება:

"ზოგადად, ახალგაზრდების ჯანსაღი ცხოვრების წესი არის ძალიან მნიშვნელოვანი და იქნება ჩვენი სამინისტროს ერთ-ერთი პრიორიტეტი. ეს არის ის თემატიკა, რომელსაც სჭირდება სერიოზული, კომპლექსური, ფუნდამენტური მიდგომა და ამას განახორციელებს ჩვენი სამინისტრო. ყველა ის პროგრამა, რომელიც იყო წარმატებული, გაგრძელდება. არის გამოწვევები, რაც უკავშირდება განათლების ხარისხსა და მეცნიერების ხარისხის განვითარებას".

დღეს, 13 ნოემბერს გამართულ ბრიფინგზე პრემიერ-მინისტრმა გიორგი კვირიკაშვილმა დაადასტურა მთავრობაში დაგეგმილი ცვლილებები, რომლის მიხედვით, განათლების მინისტრის პოსტზე ალექსანდრე ჯეჯელავას მიხეილ ჩხენკელი შეცვლის. სწორედ ალექსანდრე ჯეჯელავას ინიციატივა იყო, თბილისის ზოგიერთ სკოლაში მოსწავლეებისთვის ვაშლების დარიგება.

ახალწარდგენილი მინისტრი, აქამდე, ივანე ჯავახიშვილის სახელობის თბილისის სახელმწიფო უნივერსიტეტის რექტორის მოადგილის პოსტს იკავებდა.