შინაგან საქმეთა სამინისტროს ინფორმაციით, ამალი-დევდორაკის ხეობიდან, სადაც დღეს, გამთენიისას, ღვარცოფი მოვარდა, მოქალაქეების ევაკუაცია დასრულებულია.

200–მდე ადამიანი დაბა სტეფანწმინდაშია გადაყვანილი. მათი ნაწილი თბილისის მიმართულებით მიკროავტობუსების საშუალებით გადმოიყვანეს. სამაშველო ღონისძიებებში ჩართული იყო სასაზღვრო პოლიციის ორი ვერტმფრენი.

ხეობაში საგანგებო სიტუაციების მართვის სააგენტოს მაშველები კვლავ უწყვეტ რეჟიმში განაგრძობენ მუშაობას.

შსს-ს პრესსამსახურის ცნობით, ხეობაში იმყოფებოდა შს მინისტრი გიორგი მღებრიშვილი, რომელმაც გადაუდებელ სამუშაოებს ადგილზე კოორდინაცია გაუწია.

სტიქიის ზონიდან მოქალაქეები უსაფრთხოდ არიან გამოყვანილნი. შსს-ს საპატრულო პოლიციის თანამშრომლებმა მიმდებარე ტერიტორიიდან მანქანების გამოყვანაც შეძლეს.

შემთხვევის ადგილზე თბილისიდან განსაკუთრებულ საგანგებო სიტუაციებზე რეაგირების სამმართველოს მაშველთა ჯგუფია გაგზავნილი.

მოქალაქეების უსაფრთხოების დაცვის მიზნით, გზის დაზიანებულ მონაკვეთზე საავტომობილო მოძრაობა დროებით აკრძალულია.