გორის მუნიციპალიტეტის სოფელ ერგნეთში ინციდენტების პრევენციისა და მათზე რეაგირების მექანიზმის (IPRM) 133-ე შეხვედრა ჩატარდა. ამის შესახებ ინფორმაციას სუს ავრცელებს. მათი ცნობით, სახელმწიფო უსაფრთხოების სამსახურის წარმომადგენლებმა კვლავ მკაცრად დააყენეს

  • საქართველოს მოქალაქის, თამაზ გინტურის მკვლელობაში დამნაშავე რუსეთის საოკუპაციო ძალების წარმომადგენლის/წარმომადგენლების პასუხისგებაში მიცემისა და სამართლის აღსრულების საკითხი.
  • უკანონო ე.წ. ბორდერიზაციის დაგმობა;
  • ოკუპირებულ ცხინვალის რეგიონში ადამიანის ფუნდამენტური უფლებების დარღვევის მზარდი ტენდენცია;
  • ოკუპირებულ ტერიტორიებზე თავისუფალი გადაადგილების უკანონო შეზღუდვა.

შეგახსენებთ, რომ თამაზ გინტური — საქართველოს შეიარაღებული ძალების ვეტერანი — 2023 წლის 6 ნოემბერს, გორის მუნიციპალიტეტის სოფელ კირბალთან, საოკუპაციო ხაზის მიმდებარედ, რუსეთის საოკუპაციო ძალების წარმომადგენლებმა მოკლეს. ის ადგილობრივ მცხოვრებ ლევან დოთიაშვილთან ერთად ლომისის წმინდა გიორგის ეკლესიაში მიდიოდა, რომლის კარიც რუს ოკუპანტებს აჭედილი ჰქონდათ. ტაძართან რუსულმა სამხედროებმა მათ ცეცხლი გაუხსნეს — გინტური ზურგში მიყენებული ცეცხლსასროლი ჭრილობებით გარდაიცვალა, ხოლო დოთიაშვილი გაიტაცეს (მოგვიანებით გაათავისუფლეს).

ერგნეთში გამართულ შეხვედრას პარტია გახარია საქართველოსთვის გამოეხმაურა. მათი თქმით, უწყებამ განცხადებაში არ ახსენა ცხინვალის საოკუპაციო რეჟიმის წარმომადგენლის მოთხოვნა იმის შესახებ, რომ ქართულმა მხარემ ჩორჩანას საპოლიციო საგუშაგო აიღოს.

პარტია მოითხოვს, რომ სუს-მა და საგარეო უწყებამ საზოგადოებას მიაწოდოს ინფორმაცია, თუ რა პასუხი გასცეს ოკუპირებული ტერიტორიის წარმომადგენლის ამ მოთხოვნას.

"დღეს, 2026 წლის 23 ივლისს, გორის მუნიციპალიტეტის სოფელ ერგნეთში ინციდენტების პრევენციისა და რეაგირების მექანიზმის (IPRM) 133-ე შეხვედრა გაიმართა. შეხვედრის შემდგომ, ცხინვალის საოკუპაციო რეჟიმის წარმომადგენელმა განაცხადა, რომ შეხვედრის ფარგლებში მოითხოვეს ჩორჩანას საპოლიციო საგუშაგოს აღება. საოკუპაციო რეჟიმის ე.წ. დელეგაციის ხელმძღვანელის, იგორ კოჩიევის თქმით: "ქართული მხარის პასუხებიდან გამომდინარე, კვლავ გვრჩება იმედი, რომ საღი აზრი გაიმარჯვებს, ეს საგუშაგო გაყვანილი იქნება რესპუბლიკის ტერიტორიიდან და აღდგება სტატუს-კვო, რომელიც მის აღმართვამდე 2019 წლის აგვისტოს ბოლოს არსებობდა".

საქართველოს უსაფრთხოების სამსახურმა გაავრცელა განცხადება დღევანდელი შეხვედრის შესახებ, სადაც საოკუპაციო რეჟიმის უკანონო მოთხოვნა — ჩორჩანას საგუშაგოს აღებასთან დაკავშირებით — დამალეს.

სახელმწიფო უსაფრთხოების სამსახურისგან და საგარეო საქმეთა სამინისტროსგან მოვითხოვთ, დაუყოვნებლივ აცნობონ საქართველოს მოსახლეობას, რა პასუხი გასცეს საოკუპაციო რეჟიმის წარმომადგენლებს, რაც მათ იმედს აძლევს, რომ ოცნების ხელისუფლება აიღებს ქართულ საგუშაგოს და დათანხმდება ქართული მიწის გადაცემას ცხინვალის რეჟიმისთვის. აღსანიშნავია, რომ ცხინვალის მხარის "იმედები" ქართული პოლიციის პოსტის აღებაზე პირდაპირ უკავშირდება "ოცნების" ბოლოდროინდელ პოლიტიკას და გიორგი გახარიას შინაგან საქმეთა მინისტრობისას ჩორჩანაში საგუშაგოს აღმართვის და ქართული მიწის დაცვის გამო გიორგი გახარიას გასამართლებას," — წერს პარტია.

2025 წელს 13 ნოემბერს სასამართლომ დააკმაყოფილა პროკურატურის შუამდგომლობა და ე.წ ჩორჩანას ეპიზოდზე ყოფილ პრემიერმინისტრს, გიორგი გახარიას პატიმრობა დაუსწრებლად შეუფარდა. პროკურატურის განმარტებით, საშიშროებაა ახალი დანაშაულის ჩადენის, მოწმეებზე ზემოქმედების და მიმალვის. გადაწყვეტილება მოსამართლე დავით კურტანიძემ მიიღო. გიორგი გახარია სასამართლო სხდომას არ დასწრებია. ის საქართველო მიმდინარე წლის ივნისში დატოვა.