სუს-ის ყოფილი უფროსი, გეკა გელაძე, თანამდებობის დატოვების შემდეგ, შს მინისტრის მოადგილე იქნება. ამის შესახებ ბრიფინგზე პრემიერმა კობახიძემ განაცხადა.

რაც შეეხება სუს-ის უფროსს, ამ პოსტზე პრემიერმა თამაზ ბორაშვილი წარადგინა. მანამდე კი გაწეული საქმიანობისთვის გეკა გელაძეს მადლობა გადაუხადა.

"როგორც მოგეხსენებათ, დღეს სახელმწიფო უსაფრთხოების სამსახურის უფროსმა, ბატონმა გეგა გელაძემ დატოვა დაკავებული თანამდებობა.

პირველ რიგში, გეკა გელაძეს გაწეული საქმიანობისთვის მადლობას გადავუხდი. ბატონი გეკა გელაძე არის გამორჩეულად კეთილსინდისიერი ადამიანი და გამორჩეული პროფესიონალი. როგორც შინაგან საქმეთა მინისტრის, ისე სახელმწიფო უსაფრთხოების სამსახურის უფროსის თანამდებობაზე მუშაობის პერიოდში, მან ძალიან დიდი წვლილი შეიტანა სახელმწიფო უსაფრთხოების უზრუნველყოფისა და დანაშაულის წინააღმდეგ ბრძოლის, მათ შორის ორგანიზებული, ნარკოტიკული და კორუფციული დანაშაულის წინააღმდეგ ბრძოლის საქმეში.
ბატონი გეგა გელაძე დაიკავებს შინაგან საქმეთა მინისტრის მოადგილის თანამდებობას. თავისი ცოდნითა და გამოცდილებით ის მნიშვნელოვნად გააძლიერებს საქართველოს შინაგან საქმეთა სამინისტროს გუნდს. კიდევ ერთხელ ვუხდი ბატონ გეგა გელაძეს მადლობას გაწეული საქმიანობისთვის და წარმატებებს ვუსურვებ.

ხოლო სახელმწიფო უსაფრთხოების სამსახურის უფროსის თანამდებობაზე დღეს საქართველოს პარლამენტს წარვუდგენთ ბატონი თამაზ ბორაშვილის კანდიდატურას.

თამაზ ბორაშვილი 20 წელზე მეტია ემსახურება სამართალდამცავ სისტემას. სახელმწიფო უსაფრთხოების სისტემაში მან მუშაობა ყველაზე დაბალი პოზიციიდან დაიწყო და კონტრდაზვერვის დეპარტამენტში გაიარა თანმიმდევრული კარიერული წინსვლა სხვადასხვა საფეხურზე. 2017-22 წლებში თამაზ ბორაშვილი საქართველოს შინაგან საქმეთა სამინისტროში იკავებდა გენერალური ინსპექციის უფროსის ბიუროს უფროსის მოადგილისა და გენერალური ინსპექციის უფროსის თანამდებობებს. 2022 წელს ის კვლავ დაბრუნდა სახელმწიფო უსაფრთხოების სამსახურში, სადაც იკავებდა სახელმწიფო უსაფრთხოების დეპარტამენტის თბილისის მთავარი სამმართველოს უფროსისა და სახელმწიფო უსაფრთხოების დეპარტამენტის დირექტორის თანამდებობებს. წელს კი დაინიშნა სახელმწიფო უსაფრთხოების სამსახურის უფროსის მოადგილედ.

ხაზგასმით მინდა აღვნიშნო, რომ ბოლო ორი ათწლეულის მანძილზე თამაზ ბორაშვილი იქნება სახელმწიფო უსაფრთხოების სისტემის პირველი კარიერული წარმომადგენელი, რომელიც დაიკავებს სახელმწიფო უსაფრთხოების სისტემის ხელმძღვანელის თანამდებობას, რაც, ვფიქრობ, მნიშვნელოვან როლს შეასრულებს სისტემის ინსტიტუციურ გაძლიერებაში. დარწმუნებული ვარ, საქართველოს პარლამენტი ნდობას გამოუცხადებს თამაზ ბორაშვილს. ბატონ თამაზ ბორაშვილს წარმატებებს ვუსურვებ საქართველოს სახელმწიფო უსაფრთხოების სამსახურის უფროსის თანამდებობაზე. დიდი მადლობა", — განაცხადა კობახიძემ.

ამავე ბრიფინგზე თამაზ ბორაშვილი განაცხადა, რომ "პარლამენტის მიერ ნდობის გამოცხადების შემთხვევაში, შეეცდება ორმაგი ენერგიით შეუდგეს ქვეყნის ინტერესების დაცვას და უსაფრთხოების გაძლიერებას".

"პირველ რიგში, მადლობას გიხდით გამოცხადებული ნდობისთვის და სახელმწიფო უსაფრთხოების სამსახურის თანამდებობაზე ჩემი კანდიდატურის წარდგენისთვის. 20 წელზე მეტია, რაც ჩვენი ქვეყნის ეროვნული უსაფრთხოების ინტერესებს ვემსახურები. ჩემი არჩევის შემთხვევაში, განსაკუთრებული პატივი იქნება ამ თანამდებობის დაკავება. პარლამენტის მიერ ნდობის გამოცხადების შემთხვევაში, შევეცდები ორმაგი ენერგიით შევუდგე ჩვენი ქვეყნის ინტერესების დაცვას, უსაფრთხოების გაძლიერებას და დიდი პატივი იქნება ჩემთვის ამ თანამდებობის დაკავება.

მადლობას ვუხდი ბატონ გეგა გელაძეს ღირსეული ხელმძღვანელობისთვის სახელმწიფო უსაფრთხოების სამსახურში და წარმატებას ვუსურვებ მას ახალ გამოწვევებში", — განაცხადა ბორაშვილმა.

ირაკლი კობახიძის განცხადებით, ახლო მომავალში მთავრობასა და სხვადასხვა სახელმწიფო სტრუქტურაში არსებით საკადრო ცვლილებებს არ უნდა ველოდოთ.

"მნიშვნელოვანი ცვლილებები განხორციელდა რამდენიმე სტრუქტურაში. საგამოძიებო სამსახური არის ძალიან მნიშვნელოვანი სტრუქტურა, ფინანსთა სამინისტროს ქვეშ ფუნქციონირებს, როგორც მოგეხსენებათ, ანალოგიურად შემოსავლების სამსახურიც. თავისი პოზიცია ჰქონდა ამ საკითხთან დაკავშირებით ფინანსთა მინისტრს, რაც იყო სრულიად ლოგიკური და ბუნებრივია, და რა თქმა უნდა, ეს პოზიცია გავაზიარეთ შესაბამისი არგუმენტების საფუძველზე", — თქვა კობახიძემ.

მისივე თქმით, უახლოეს მომავალში კულტურის ახალი მინისტრიც დაინიშნება.

შეგახსენებთ, რომ გელა (გეკა) გელაძემ სუს-ის უფროსის პოსტზე მამუკა მდინარაძე შეცვალა და თანამდებობა 2026 წლის აპრილში დაიკავა. მანამდე, 2025 წლის მაისიდან 2026 წლის აპრილამდე, შინაგან საქმეთა მინისტრი იყო, მანამდე კი სუს-ის უფროსის მოადგილე, თავდაცვისა და განათლების მინისტრების მოადგილე, ასევე განათლების სამინისტროს მანდატურის სამსახურის უფროსი.