ნუცუბიძის ფერდობზე დაკავების დროს გარდაცვლილი პაატა პავლიაშვილის საქმის მოწმე, ნოდარ შანიძე აცხადებს, რომ დაღუპულის მიერ ფსიქოტროპული წამლების მოხმარების შესახებ მას შსს-ს წარმომადგენლებმა ჰკითხეს. ამის შესახებ შანიძემ, პროკურატურაში დაკითხვის შემდეგ, ჟურნალისტებთან ისაუბრა:

"ინტერვიუ, რომელიც მე მივეცი შინაგან საქმეთა სამინისტროს ოპერატორებს, იყო კითხვა-პასუხის რეჟიმში ჩაწერილი ინტერვიუ. მე ისინი მეკითხებოდნენ, მერე რთავდნენ კამერას და ვპასუხობდი. ფისქოტროპულებზე მათ მკითხეს, მე კი არ მომიგონია ეს."

25 ოქტომბერს, შსს-ს ცნობით, ადმინისტრაციული წესით დაკავების დროს, კაცი "უეცრად შეუძლოდ გახდა და გარდაიცვალა". ინციდენტის შემდეგ, შსს-ს პრესსამსახურის უფროსმა ფეისბუკზე დაწერა, რომ პოლიციელის ბრალეულობა კატეგორიულად გამორიცხულია. უწყებამ, ასევე, გაავრცელა ვიდეო, რომელშიც მოწმე, ნოდარ შანიძე ამბობს, რომ დაღუპული ფსიქოტროპულ მედიკამენტებს იღებდა.

საქმეზე გამოძიებას საქართველოს მთავარი პროკურატურა 116-ე მუხლით აწარმოებს, რაც გაუფრთხილებლობით სიცოცხლის მოსპობას გულისხმობს. უწყების განცხადებით, პოლიციელის სამხრე კამერიდან ამოღებულ კადრებზე გარდაცვლილის დაკავება არ არის ასახული.