დიდი ბრიტანეთისა და ჩრდ. ირლანდიის გაერთიანებული სამეფოს თავდაცვის მინისტრმა, შეუსაბამო სექსუალური ქცევის ბრალდებების შემდეგ, თანამდებობა დატოვა. მისი თქმით, მან ვერ დაიცვა ის მაღალი სტანდარტები, რომლებსაც თანამდებობა სთხოვდა.

გადადგომამდე ერთი დღით ადრე, სერ მაიკლ ფელონის პრესსამსახურმა დაადასტურა, რომ 2002 წელს, ვახშამზე ჟურნალისტ ჯულია ჰარტლი-ბრიუვერის მუხლზე ხელის დადების გამო, ფელონმა მისგან შენიშვნა მიიღო.

როგორც ფელონმა BBC-სთან განაცხადა, კულტურა შეიცვალა და რაც 10-15 წლის წინ მისაღებად ითვლებოდა ახლა აღარ არის მისაღები.

ის პირველი პოლიტიკოსია, რომელიც ბრიტანულ პარლამენტში სექსუალური ძალადობის ბრალდებების შემდეგ გადადგა.

BBC-ის პოლიტიკური რედაქტორის კითხვას, ფიქრობს თუ არა, რომ ბოდიში აქვს მოსახდელი ფელონმა ასე უპასუხა: "ვფიქრობ, თუ გადავხედავთ საკუთარ წარსულს, ყოველთვის იპოვი რაღაცას, რასაც ნანობ და განსხვავებულად გააკეთებდი."

ჰარტლი-ბრიუვერი სანდეი ექსპრესის ყოფილი პოლიტიკური რედაქტორია. როგორც მან BBC რადიო 4-თან განაცხადა, "თუ ის გადადგა იმის გამო, რომ 15 წლის წინ ჩემს მუხლს შეეხო, ეს ყველაზე აბსურდული მიზეზი იქნებოდა, რატომაც სამყაროში ადამიანმა სამსახური დაკარგა. ამიტომ იმედი მაქვს, რომ ამის გამო არ დაუტოვებია თანამდებობა."