6 წლის წინ გარდაცვლილი 23 წლის პროგრამისტის, თამარ ბაჩალიაშვილის დედა თეონა თამაზაშვილი პროკურატურაში დღესაც მივიდა და მისი შვილის მკვლელობის საქმეზე უპასუხო კითხვების ნაწილი პლაკატებით მიიტანა.

ბევრს სხვა კითხვასთან ერთად, გარდაცვლილი პროგრამისტის დედას აინტერესებს — ელექტროშიკით ვისგან უნდა დაეცვა თავი მის შვილს, რატომ ეძებდა პოლიტიკურ თავშესაფარს ნორვეგიაში? რატომ მისცა თამარის "მეგობარმა" დეა კაპანაძემ 5 სხვადასხვა ჩვენება? რატომ გახდა საჭირო მისგან ხუთჯერ ჩვენების აღება?

"1. თამარს ჰქონდა ელექტროშოკი, რატომ? ვისგან უნდა დაეცვა თავი?
2. რატომ ეძებდა პოლიტიკურ თავშესაფარს ნორვეგიაში?
3. რატომ წაშალა შსს-მ იმ სამსახურის კამერის ჩანაწერები, სადაც მუშაობის დასაწყებად მივიდა კომპანია "ზეგი"-დან წამოსვლის შემდეგ?
4. რატომ ჩამოაშორეს საქმეს დამოუკიდებელი ექსპერტი გალინა კარმუშინა?
5. რატომ გადაჭრეს საკალმახე "ადმირალის" კამერების კაბელები? (იმიტომ ხომ არა, რომ არ აწყობდათ იქ დაფიქსირებული თამარის მანქანა? რადგან მისთვის ჩაგდებული ლოკაცია, სადაც წავიდა, იყო სწორედ საკალმახე).
6. რატომ მისცა თამარის "მეგობარმა" დეა კაპანაძემ 5 სხვადასხვა ჩვენება? რატომ გახდა საჭირო მისგან ხუთჯერ ჩვენების აღება?
7. რატომ უთხრა თამარის მამას პოლიციელმა ლადო ბაჭულაშვილმა: "შენი გოგო დიდ შარშიაო?!"
8. რატომ დაიბარა ციხეში სუსის ყოფილმა აგენტმა ივანე გელაშვილმა ადვოკატი მიხეილ რამიშვილი და რატომ უთხრა: "პირადად მე გადავცემდი ფლეშკებს თამარ ბაჩალიაშვილსო"?
9. რატომ შეუქმნეს პრობლემები პროგრამისტ გიორგი ლუბარეცს, რომელმაც უბრალოდ დასერჩა ვილა ალგეთი??
10. რაღა მაინცდამაინც მანქანაში დატოვა წერილი თამუნამ და არა სახლში (სამ სიტყვიანი წერილი, რომელიც მის კალიგრაფიას არ ჰგავს)?
11. რატომ არ თქვა ფსიქოლოგმა ქეთევან კობალაძემ, ვისთანაც ბოლოს დადიოდა თამარი, რომ სუიციდისადმი ჰქონდა მიდრეკილება? ტესტიც კია რ ჩაატარა.
12. თამარს ბრიტანული ინგლისურის გამოცდის ჩაბარება უნდოდა კარიერის გასაგრძელებლად, არსებობს საქმეში ამის მტკიცებულება. ამ და სხვა გეგმების მქონე გოგო თავს მოიკლავდა?
13. ვინ იყო ოჯახისთვის უცნობი ქალი, რომელიც პანაშვიდზე მოვიდა ღამის 11 საათზე და თამარს და დედამისს ბოდიშებს უხდიდა?
14. სად იდგა თამარის მანქანა 4 დღის განმავლობაში 18 ივლისიდან 22 ივლისამდე??
15. რატომ არაა საქმეში სრულყოფილი ინფორმაცია მთელი კომუნიკაციის შესახებ? სმს-მიმოწერები, ფეისბუქის მიმოწერა, რატომ შეიცვალა სასამართლოს განჩინება პროკურატურის შუამდგომლობის საფუძველზე ახალი განჩინებით, სადაც მხოლოდ IP მისამართების მოთხოვნაზე იყო საუბარი და არა მთელ კომუნიკაციაზე შინაარსობრივი ნაწილის ჩათვლით?
16. რატომ არ ემთხვევა თამარის შეძენილი და მის ორგანიზმში აღმოჩენილი მედიკამენტები ერთმანეთს?
17. რატომ დაალუქინეს გამომძიებელ სერგო შუბითიძეს განმეორებით უკვე დალუქული ტელეფონი?
18. რატომ მოხდა გამომძიებელ სერგო შუბითიძეზე და მის ოჯახზე ზეწოლა? რატომ დააკავეს ის და შემდეგ რატომ გააქციეს ქვეყნიდან?
19. რატომ ჩაუგდეს ჟურნალისტ ელისო კილაძეს ვილა-ალგეთის საკადასტრო კოდი?
20. რატომ გვითხრა გიორგი ღარიბაშვილმა (ვილა- ალგეთის მეპატრონემ) ?თქვენი შვილი მოკლესო?
21. რატომ გარდაიცვალა გიორგი ღარიბაშვილი გაურკვეველ სიტუაციაში, მასთან პირველი და უკანასკნელი გასაუბრებიდან რამოდენიმე თვეში?
22. რატომ არ უბრუნებენ თამარის (ნაჩუქარ) კომპიუტერს ოჯახს, რა იმალება მის კომპიუტერში?", — წერს თეონა თამაზაშვილი სოციალურ ქსელში.

შეგახსენებთ, რომ ბაჩალიაშვილის ოჯახის წევრები 19 აგვისტოს პროკურატურაში მივიდნენ და განცხადება შეიტანეს მათი შვილის საქმეზე ხელახალ გამოძიების დაწყების მოთხოვნით. პროკურატურამ საქმის ხელახალ გამოძიებაზე უარი განაცხადა. უწყების განცხადებით, მტკიცებულებები უტყუარად ადასტურებს, რომ ადგილი არ ჰქონია დანაშაულს და პროგრამისტმა სიცოცხლე თვითმკვლელობით დაასრულა. მშობლები უწყების გადაწყვეტილებას არ ეთანხმებიან და ბრძოლასა და საპროტესტო აქციებს აგრძელებენ. 23 წლის პროგრამისტის დედამ, თეონა თამაზაშვილმა, ყოველ ორშაბათს 11:00 საათზე პროკურატურაში აქცია დააანონსა.