გიორგი გახარია პროკურატურის ბრალის წარდგენის შემდეგ პირველ კომენტარს ავრცელებს — გახარიამ განცხადება ინგლისურ ენაზე X-ზე გამოაქვეყნა. გახარიას შეფასებით, მის წინააღმდეგ სამართლებრივი დევნის დაწყება ბიძინა ივანიშვილის წინასაარჩევნო მუქარის შესრულებაა.

"გუშინ, "ქართული ოცნების" რეჟიმმა ჩემ წინააღმდეგ პოლიტიკური დევნა ოფიციალურად დააკანონა — გამომიგზავნეს შეთითხნილი ბრალდებები. უკვე დღეს სასამართლომ წინასწარი პატიმრობა შემიფარდა. ეს ნაბიჯი პირდაპირ ასრულებს ივანიშვილის წინასაარჩევნო მუქარას, როცა მან საჯაროდ განაცხადა, რომ "სისხლის სამართლის საქმეები სასამართლოების დონეზე უკვე მოაგვარა".

ბრალდებები ეხება ჩორჩანის საქმეს და 20 ივნისის მოვლენებს — აშკარა განზრახვით, შემდგომშიც შეთითხნიან დამატებითი ბრალდებებს.

ჩვენი პოლიტიკური პარტიისთვის — და პირადად ჩემთვის, ემიგრაციიდან — ეს ახალი ეტაპია ბრძოლაში საქართველოს ევროპული მომავლის შესანარჩუნებლად. ეს ბრძოლა ახლა უკვე მოითხოვს ყველა შესაძლო პლატფორმის გამოყენებას. ხელისუფლების ეს უკანასკნელი ნაბიჯი კიდევ ერთხელ ამტკიცებს, რომ ჩვენი გადაწყვეტილებები — მივიღოთ მონაწილეობა ადგილობრივ არჩევნებში და შემოვიდეთ პარლამენტში — ერთადერთი სწორი სტრატეგიული ნაბიჯები იყო ამ მიზნის მისაღწევ გზაზე.

სამწუხაროდ, როგორც საქართველოს დემოკრატიულმა ძალებმა, ისე დასავლეთმა ერთობლივად წააგეს ბრძოლა პროპაგანდის წინააღმდეგ. მაგრამ ჩვენ არ გვაქვს უფლება, წავაგოთ გაცილებით მნიშვნელოვანი ბრძოლა — საქართველოს ევროპული იდეის შესანარჩუნებლად. ამ ბრძოლის წაგება სერიოზულ და გრძელვადიან შედეგებს მოიტანს არა მხოლოდ ჩვენი ქვეყნისთვის, არამედ მთელი რეგიონისთვის.

მიუხედავად მზარდი რეპრესიული გარემოსა, თავისუფლება და დემოკრატია ღრმადაა ფესვგადგმული ქართულ საზოგადოებაში. ევროპის იდეა საქართველოში უნდა დავიცვათ, ხოლო საქართველო მტკიცედ უნდა დარჩეს დასავლური დღის წესრიგის ნაწილად. ურთიერთობების გაწყვეტა ან დისტანცირება მხოლოდ დააჩქარებს ქვეყნის ჩავარდნას რუსეთის გავლენის სფეროში," — წერს გახარია.

შეგახსენებთ, სასამართლომ დააკმაყოფილა პროკურატურის შუამდგომლობა და ე.წ ჩორჩანას ეპიზოდზე ყოფილ პრემიერმინისტრს, გიორგი გახარიას პატიმრობა დაუსწრებლად შეუფარდა.

პროკურატურის განმარტებით, საშიშროებაა ახალი დანაშაულის ჩადენის, მოწმეებზე ზემოქმედების და მიმალვის. გადაწყვეტილება მოსამართლე დავით კურტანიძემ მიიღო. გიორგი გახარია სასამართლო სხდომას არ დასწრებია. ის საქართველო მიმდინარე წლის ივნისში დატოვა.

გუშინ, 12 ნოემბერს ცნობილი გახდა, რომ პროკურატურამ გიორგი გახარიას მიმართ 20-21 ივნისის საქმეზე და ჩორჩანას ეპიზოდზე სისხლის სამართლის დევნა დაიწყო.