ტომ ჰოლანდმა ახალ ინტერვიუში ზენდეია "ცოლად" მოიხსენია, რამაც წყვილის საიდუმლოდ ქორწინებაზე ვარაუდები კიდევ უფრო გააძლიერა.

ბრიტანულ პოდკასტში სტუმრობისას მსახიობს ჰკითხეს, თუ ვის წაიყვანდა საბერძნეთში დასასვენებლად.

"ალბათ, ჩემი ცოლი კარგი არჩევანი იქნებოდა", — უპასუხა ტომ ჰოლანდმა და ხუმრობით დაამატა, რომ ზენდეიას ნაცვლად სხვა ადამიანის არჩევა საკმაოდ უცნაური იქნებოდა.

ტომ ჰოლანდს ზენდეია "ცოლად" პირველად ახლა არ მოუხსენიებია. ივნისში, Esquire-თან ინტერვიუში, მას ხელოვნური ინტელექტით შექმნილ ფოტოებზე ჰკითხეს, რომლებზეც თითქოს მისი და ზენდეიას ქორწილი იყო ასახული. მსახიობის თქმით, გავრცელებული ფოტოების გამო ოჯახის წევრებისთვის არაფრის ახსნა დასჭირვებია, რადგან ისინი ყველანი ქორწილს ესწრებოდნენ. მსახიობმა ფაქტობრივად მიანიშნა, რომ მან და ზენდეიამ ახლობლების გარემოცვაში მართლაც იქორწინეს. დამატებითი დეტალების გამხელაზე კი უარი თქვა და აღნიშნა, რომ ამ თემაზე მეტს აღარ ისაუბრებდა.

ფოტო: Universal Pictures

ფოტო: Universal Pictures

ოდისეას შესახებ ინტერვიუებში ჰოლანდი ზენდეიას ხშირად ახსენებს. მისი თქმით, როლზე დათანხმებამდე შეთავაზება ჯერ მას გაუზიარა, ზენდეიამ კი ხუმრობით უთხრა, რომ ნოლანის ფილმზე უარის შემთხვევაში, მიატოვებდა.

Wired-სთან ინტერვიუში ტომ ჰოლანდმა ასევე იხუმრა, რომ ფილმში ზენდეიას პერსონაჟსა და ოდისევსს რომანი ვერ ექნებოდათ, რადგან ის ტომზე იყო დაქორწინებული.

ტომ ჰოლანდმა და ზენდეიამ ერთმანეთი 2017 წლის ფილმის, Spider-Man: Homecoming-ის, გადაღებებზე გაიცნეს. მათი ურთიერთობა კი ოფიციალურად 2021 წელს გასაჯაროვდა.