პატარა მაკაკა, პანჩი, იაპონიის ზოოპარკში მალე კონდიციონერით გაგრილდება, ვინაიდან ზაფხულის გაუარესებული კლიმატური პირობები ზოოპარკის ბინადრებზე უფრო და უფრო ცუდად აისახება.

ქალაქ იჩიკავას მუნიციპალიტეტმა პანჩისა და მასთან მცხოვრები სხვა მაკაკების პირობების გასაუმჯობესებლად 2026 წლის ბიუჯეტიდან $432 ათასი (¥70 მილიონი) გამოყო.

მაიმუნების მთაზე, სადაც პანჩი ბინადრობს, სპეციალური, მზისგან დამცავი და დასასვენებელი სივრცეები მოეწყობა. კონდიცირების სისტემის დაყენება ამ წლის ზაფხულისთვის იგეგმება.

ფოტო: CNN

ვოლიერების კეთილმოწყობა ნაწილობრივ საზოგადოებამ დააფინანსა. ქალაქმა მარტში საქველმოქმედო კამპანია დაიწყო და მაისის ბოლოსთვის მხარდამჭერებისგან უკვე $266 ათასი (¥43 მილიონი) შეაგროვა.

პანჩი 2025 წლის 26 ივლისს, აუტანელი სიცხეების დროს დაიბადა. მძიმე მშობიარობის შემდეგ, დედამ პატარა მაკაკა მეორე დღესვე მიატოვა. ზოოპარკის თანამშრომლებმა მისი გაზრდა საკუთარ თავზე აიღეს: პატარას საათობრივად კვებავდნენ და დიდი ზომის სათამაშო მაიმუნი აჩუქეს, რომელსაც პანჩი მაშინვე მიეჯაჭვა.

სათამაშოსთან ჩახუტებული პანჩის კადრები ინტერნეტში ვირუსულად გავრცელდა და მილიონობით ადამიანის გული მოიგო.

პანჩი თავის სათამაშოსთან ერთად

პანჩი თავის სათამაშოსთან ერთად

ფოტო: Getty Images

იაპონური მაკაკები ცივ კლიმატს არიან შეჩვეულნი, რის გამოც ზაფხულის სიცხეები მათთვის აუტანელია. ველური ბუნებისგან განსხვავებით, ვოლიერში მყოფ ცხოველებს არ შეუძლიათ დამოუკიდებლად ჩრდილის ან გრილი ადგილის მოძებნა. ზოოლოგების თქმით, ექსტრემალური სიცხე ცხოველებში იწვევს სტრესს და უარყოფითად მოქმედებს დედობრივ ინსტინქტზე, განსაკუთრებით მათში, ვინც პირველად მშობიარობს.

მონაცემები მოწმობს, რომ იაპონიაში ზაფხული წლიდან წლამდე სულ უფრო მეტად ცხელი ხდება.