11 ივნისს ევროკომისიისა და საქართველოს დელეგაციის წარმომადგენლებს შორის დაგეგმილი შეხვედრა ტექნიკური და პროცედურული ხასიათისაა, — ამის შესახებ ევროკომისიის პრესსპიკერმა, მარკუს ლამერტმა Euroscope-ის კითხვის საპასუხოდ განაცხადა. მისივე თქმით, აღნიშნული მოლაპარაკებები სავიზო რეგულაციით გაწერილ სტანდარტულ წესს წარმოადგენს, რომელიც ავტომატურად მაშინ იწყება, როდესაც სავიზო რეჟიმის შეჩერების მექანიზმი უკვე ამოქმედებულია.

როგორც ლამერტი აღნიშნავს, ეს პროცედურა მიმდინარე წლის მარტში მიღებული სამართლებრივი გადაწყვეტილების პირდაპირი შედეგია, რომლის მიხედვითაც დიპლომატიური და სამსახურებრივი პასპორტების მფლობელ საქართველოს მოქალაქეებს უვიზო მიმოსვლა 12 თვის ვადით შეუჩერდათ. სპიკერის თქმით, შეხვედრის მთავარი ტექნიკური მიზანია იმ გარემოებების განხილვა და გამოსწორება, რამაც ევროკავშირი ამ გადაწყვეტილებამდე მიიყვანა, რაც თავის მხრივ უკავშირდება საქართველოს მიერ დემოკრატიისა და ფუნდამენტური უფლებების სფეროში აღებული საკვანძო ვალდებულებების დარღვევას.

"შეხვედრა რომელიც გაიმართება ევროკომისიისა და საქართველოს დელეგაციის წარმომადგენლებს შორის, არის სტანდარტული პროცესის ნაწილი, რომელიც სავიზო რეგულაციით არის გაწერილი. ის იმართება, როცა ამოქმედებულია სავიზო რეჟიმის შეჩერების მექანიზმი. ეს არის მარტში მიღებული გადაწყვეტილების შედეგი, რომელიც ითვალისწინებს უვიზო მიმოსვლის შეჩერებას საქართველოში დიპლომატიური და სამსახურებრივი პასპორტების მფლობელებისთვის, თავდაპირველად 12 თვის პერიოდის განმავლობაში. ამ შეხვედრის მიზანია, გამოსწორდეს გარემოებები, რომლებმაც ამ შეჩერებამდე მიგვიყვანა და შეხვედრაზე ეს საკითხი განიხილება. ეს გარემოებები საქართველოს მხრიდან ვალდებულებების დარღვევაა, რომელიც უვიზო რეჟიმის პირობებში ჰქონდა აღებული, დემოკრატიისა და ფუნდამენტური უფლებების საკვანძო სფეროებში", — განაცხადა ევროკომისიის სპიკერმა მარკუს ლამერტმა.

შეგახსენებთ, "რადიო თავისუფლების" ევროპის ბიუროს ხელმძღვანელის, რიკარდ იოზვიაკის განცხადებით, 11 ივნისს ევროკავშირი საქართველოს უვიზო რეჟიმთან იმსჯელებს. მისივე თქმით, "ეს მნიშვნელოვანი შეხვედრაა უვიზო რეჟიმის შესაძლო შეჩერების საკითხზე".

ცნობისთვის, ევროკომისიამ საქართველოს დიპლომატიური, სამსახურებრივი და ოფიციალური პასპორტების მფლობელებისთვის უვიზო რეჟიმი საბოლოოდ მიმდინარე წლის 6 მარტს შეაჩერა.