მცხეთის რაიონულმა სასამართლომ გააუქმა თიანეთის საოლქო სასამართლოს გადაწყვეტილება ხუთი სადავო ბიულეტინის ვარგისად ცნობაზე და შესაბამისად, თიანეთის მერი თამაზ მეჭიაური გახდება.

გადაწყვეტილება სასამართლოში რამდენიმე წუთის წინ გამოცხადდა. მეჭიაურის ინტერესებს სასამართლოში საქართველოს ახალგაზრდა იურისტთა ასოციაცია იცავდა. ორგანიზაციის წარმომადგენლის, ირმა პავლიაშვილის თქმით, სასამართლომ გააუქმა საოლქო საარჩევნო კომისიის ორი გადაწყვეტილება - ბიულეტენების გადათვლისა და ბათილი ბიულეტენების ნამდვილად ცნობის შესახებ. შესაბამისად, ძალაში დარჩა შემაჯამებელი ოქმი, რომლითაც მეჭიაურმა არჩევნები მოიგო.

ცესკოს წინასწარი მონაცემებით, თამაზ მეჭიაური კონკურენტ ლელა ქიტესაშვილს, რომელიც ქართული ოცნების კანდიდატი იყო, არჩევნებს ერთი ხმით უგებდა, თუმცა, საოლქო კომისიამ გაბათილებული ხუთი ბიულეტენი ვარგისად მიიჩნია. შედეგად, ლელა ქიტესაშვილს 3 081 ხმა მიაკუთვნა, მეჭიაურს კი - 3 077.

თამაზ მეჭიაური მიიჩნევდა, რომ საოლქოს გადაწყვეტილება უკანონო იყო, იგივეს იზიარებდნენ არასამთავრობო ორგანიზაციებიც. მათი აზრით, საოლქო კომისიას ბათილად ცნობილი ბიულეტენები ვარგისად არ უნდა მიეჩნია და არჩევნებში გამარჯვებულად მეჭიაური უნდა გამოცხადებულიყო.

სასამართლო სხდომას არ ესწრებოდნენ ქართული ოცნებისა და საოლქო საარჩევნო კომისიის წარმომადგენლები.

მცხეთის რაიონული სასამართლოს გადაწყვეტილების გასაჩივრება ზემდგომ ინსტანციაშია შესაძლებელი.