NATO-ს გენერალურმა მდივანმა, მარკ რუტემ, კიევში ვიზიტისას რუსეთის მზარდ დანაკარგებზე ისაუბრა და რუს ახალგაზრდებსა და მათ ოჯახებს მიმართა.

რუტემ ახალგაზრდება მოუწოდა, კარგად დაფიქრდნენ, სანამ ომში წავლენ კრემლის პროპაგანდის მსხვერპლი რომ არ აღმოჩნდნენ.

მისი თქმით, იმ ფონზე, როდესაც უკრაინა აგრძელებს მტკიცედ დგომას, ნერგავს ინოვაციებს და აღწევს წარმატებებს ბრძოლის ველზე, რუსეთი სულ უფრო სასოწარკვეთილ მდგომარეობაში ვარდება.

ალიანსის ხელმძღვანელმა რუსეთის დანაკარგების შესახებ NATO-ს მონაცემები გაასაჯაროვა, რასაც "აბსოლუტურად შოკისმომგვრელი" უწოდა:

"რუსეთის დანაკარგები კოლოსალურია — თვეში 30 000-ზე მეტი ადამიანი. ეს ნიშნავს, რომ რუსეთი ერთ თვეში იმაზე მეტ ჯარისკაცს კარგავს, ვიდრე საბჭოთა კავშირმა 1980-იან წლებში, ავღანეთის 10-წლიანი ომის განმავლობაში, დაკარგა", — განაცხადა რუტემ.

NATO-ს გენერალურმა მდივანმა თავისი გამოსვლა იმისთვის გამოიყენა, რომ პირდაპირ მიემართა იმ რუსებისთვის, რომლებსაც ფრონტზე გაწვევა ან წასვლა ემუქრებათ:

"თქვენნაირი კაცები, რომლებიც ამ ბრძოლას უერთდებიან, წვრთნას არ გადიან. აღჭურვილობა, რომელსაც გადმოგცემენ, უხარისხოა. ძალზე დიდია შანსი იმისა, რომ იქ მოკვდეთ ან დაიჭრათ. და თუ დაიჭრებით, დიდი ალბათობით, ტალახში მიგატოვებენ სატანჯველად და დასაღუპად. ასე რომ, როდესაც ათობით ათას რუსულ მსხვერპლზე ვსაუბრობთ, ეს აბსტრაქცია არ არის, მათ შორის, სავარაუდოდ, თქვენ იქნებით", — განაცხადა რუტემ.

მარკ რუტე კიევში ჩრდილოატლანტიკური საბჭოს წევრებთან ერთად ჩავიდა, რომლებიც NATO-ს 32-ვე წევრ სახელმწიფოს წარმოადგენენ. გენერალურმა მდივანმა ასევე აღნიშნა, რომ უკრაინის პრეზიდენტი, ვოლოდიმირ ზელენსკი, უკვე მიწვეულია NATO-ს ლიდერთა სამიტზე, რომელიც ანკარაში გაიმართება.