ადამიანის უფლებების დაცვის დეპარტამენტის სიძულვილის ენის წინააღმდეგ ბრძოლის სამმართველოს უფროსად შსს-ს იურისტი თამთა ქიმბარიშვილი დაინიშნა.

ცნობისათვის, გასულ წლის ივნისში უფლებადამცველ ლაშა ჩხარტიშვილის მიერ სოციალურ ქსელში გაზიარებულ თამთა ქიმბარიშვილის ფოტოზე დაწერილი კომენტარისთვის მოქალაქე დიანა გოგოლაძე 2500 ლარით დააჯარიმეს.

სიძულვილის ენის წინააღმდეგ ბრძოლის ახლად შექმნილი სამმართველო მუშაობას დღეიდან, 1-ელი ივნისიდან შეუდგა. სამმართველოს თანამშრომელთა რაოდენობა ათი საშტატო ერთეულით განისაზღვრა.

უწყების ცნობით, სამმართველოს ძირითადი ფუნქცია-მოვალეობები ადამიანის ღირსების შემლახველი-შეურაცხმყოფელი და სიძულვილის ენის შემცველი საჯაროდ გავრცელებული იმგვარი განცხადებების მონიტორინგი და პროაქტიული გამოვლენა იქნება, რომელიც შეიცავს საქართველოს ადმინისტრაციულ სამართალდარღვევათა კოდექსით გათვალისწინებულ სამართალდარღვევის ნიშნებს.

სამმართველო მოახდენს სავარაუდო სამართალდამრღვევი პირის გამოვლენას, ვინაობის დადგენას, ადმინისტრაციული წარმოების მასალების მომზადებას, ადმინისტრაციული სამართალდარღვევის ოქმის შედგენას და განსჯადობის წესების დაცვით, საერთო სასამართლოებში გადაგზავნას.

სამმართველოს თანამშრომლები, საქმიანობას განახორციელებენ იმ საკანონმდებლო ჩარჩოს ფარგლებში, რაც უკვე მოქმედებს ქვეყანაში — წერია გავრცელებულ ინფორმაციაში.