კოალიცია — ცვლილებისთვის ლიდერები ნიკა გვარამია, ზურა ჯაფარიძე და გიგა ლემონჯავა აშშ-ის სახელმწიფო დეპარტამენტის წარმომადგენლებს შეხვდნენ.

შეხვედრის შემდეგ, მედიასთან კომენტარი გააკეთა ზურა ჯაფარიძემ, რომელმაც აღნიშნა, რომ ვაშინგტონსა და ქართულ ოცნებას შორის ვითარების ნორმალიზებასთან დაკავშირებით საუბარი არ ყოფილა.

"იმაზე ლაპარაკი საერთოდ არ ყოფილა, რომ ვაშინგტონსა და ქართულ ოცნებას შორის რაღაც ნორმალიზება მოხდეს. საუბარი იყო, რა არის საქართველოს ინტერესები, ასევე ამ ქვეყანასა და ამ რეგიონში რა არის აშშ-ს ინტერესები და როგორ შეიძლება ამ ინტერესების ერთობლივად დამთხვევა და გატარება [...] ამის წინაპირობაა, რომ ქვეყანაში უნდა იყოს დემოკრატია, დამოუკიდებელი სასამართლო, კანონის უზენაესობა. როცა ლაპარაკია აშშ-ს ინტერესებზე — ამ ადმინისტრაციის პირობებში მეტწილად საუბარია აშშ-ს ეკონომიკურ ინტერესებზე, ამას სწორედ დამოუკიდებელი სასამართლო და კანონის უზენაესობა სჭირდება, რაც ლიბერალური დემოკრატიის საფუძვლებია და რაც არ გვაქვს. ჩვენი გზავნილიც ეს იყო, რომ ჩვენც ამისთვის ვიბრძვით [...]

სულ ცოტა ხნის წინ, აშშ-ს 10-წლიან ვიზას იძლეოდნენ, დღეს კი 1-თვიანი ვიზა რომ აიღო, აშშ-ში ერთი შესვლით, დეპოზიტზე 15 000 დოლარი უნდა გქონდეს. ურთიერთობა ასეთი გაუარესებულია. ამ ყველაფერზეც იყო ლაპარაკი", — განაცხადა ჯაფარიძემ (მის სიტყვას "ტაბულა" ავრცელებს) .

სახდეპის წარმომდგენლებთან შეხვედრის შემდეგ კომენტარი გააკეთა ნიკა გვარამიამაც. მან აღნიშნა რომ ამერიკის ინტერესი საქართველოში მხოლოდ ეკონომიკური არ არის და ეს ინტერესი განისაზღვრება ქართველი ხალხის პოზიციით.

"შეიძლება ვინმეს ჰგონია, რომ ამერიკული ინტერესი მხოლოდ ეკონომიკური ინტერესია ამ ქვეყანაში, ასე არ არის და ვერც იქნება. პირველ რიგში, ეს ინტერესი განისაზღვრება ქართველი ხალხის პოზიციით, რომელიც თავსებადი არ არის ქართული ოცნების მიერ განხორციელებულ პოლიტიკასთან. შეუძლებელია გატარდეს დასავლური პოლიტიკური, ეკონომიკური ინტერესი იქ, სადაც რუსული ნება ხორციელდება იმიტომ, რომ რუსეთს ეს არ უნდა, შესაბამისად, ეს ბიძინა ივანიშვილსაც არ უნდა, ის ამას ეწინააღმდეგება, ეს მისი დავალებაა, ჩემი აზრით. ამ ვიზიტზე ძალიან ნათლად გამოჩნდა, რომ კარგად ესმით ჩვენს პარტნიორებსა და მოკავშირეებს ეს ამბავი. ამიტომ, როცა საუბარი მიდის ეკონომიკურ თანამშრომლობაზე ჩვენ მხოლოდ მივესალმებით, ეს არის ჩვენი მთავარი ინტერესი, როგორც ამ ქვეყნის პატრიოტების და პოლიტიკური აქტორების, მაგრამ იმ წინაპირობების გარეშე, რაც დემოკრატიის მთავარ საბაზისო პრინციპებს გულისხმობს, რა თქმა უნდა, შეუძლებელია ნებისმიერი ეკონომიკური პროექტიც. ქვეყანაში, სადაც ელემენტარულად სასამართლო არ არის, სადაც პოლიტიკური დესტაბილიზაციაა ხელისუფლების მიერ მართული, მათ შორის პოლიტიკური პატიმრების მძევლად აყვანის მეშვეობით, უბრალოდ, არცერთი ინვესტორი არ შემოვა, მითუმეტეს ამერიკელი. ამიტომ, ამის მოგვარება რომ ერთადერთი გზით ანუ რუსული ინტერესების გამტარებელი ხელისუფლების გვერდზე გაწევით არის შესაძლებელი, ეს ჩვენც ვუთხარით, მაგრამ კარგად ჩანს, რომ მათაც ესმით", — განაცხადა ნიკა გვარამიამ (IPN).

შეხვედრის დასრულების შემდეგ ჟურნალისტებთან საუბრისას გიგა ლემონჯავამ აღნიშნა, რომ სახდეპის წარმომადგენლებს სრული ინფორმაცია აქვთ, საქართველოში მიმდინარე პროცესებთან დაკავშირებით. მანვე იმედი გამოთქვა, რომ "ვანიშვილის რეჟიმზე წნეხი გაძლიერდება".

"ჩემი აზრით, გამორიცხულია, რომ საერთაშორისო პარტნიორები დალაგდნენ, ივანიშვილის ტერმინით რომ ვისაუბროთ, რეჟიმთან ქართველი ხალხის ინტერესების ხარჯზე. მიხარია, რომ მათ სრული ინფორმაცია აქვთ, საქართველოში მიმდინარე პროცესებთან დაკავშირებით. ჩვენ მკაფიოდ ვუთხარით ჩვენი პოზიცია და ამ კუთხით მნიშვნელოვანია 26 მაისს გამართული აქცია ამ კონტექსტში, რადგან, კიდევ ერთხელ, ყველა ხედავს, რომ ქართველი ხალხი აპირებს ბრძოლას გამარჯვებისთვის.

ამიტომ, იმედი გვაქვს, რომ ივანიშვილის რეჟიმზე წნეხი გაძლიერდება, მაგრამ მთავარია ჩვენი გასაკეთებელი — ქართველი ხალხის ბრძოლა და ალიანსის სტრატეგია — ფართო მასშტაბიანი პროტესტის ორგანიზება, საერთაშორისო წნეხის გაძლიერება და სანდო პოლიტიკური ალტერნატივის შექმნა, საქართველოს მოქალაქეებისთვის. ესენი კი აუცილებლად მიგვიყვანს შედეგამდე — პოლიტიკური პატიმრების ყოველგვარი წინაპირობის გარეშე გათავისუფლება, დრაკონული კანონების გაუქმება და ახალი არჩევნების დანიშვნა.

აშშ-ს სახელმწიფოს აქვს ტრადიციული ინტერესები რეგიონში, ეს არის სტრატეგიული ინტერესების თანხვედრა, საქართველოსა და ამერიკის შეერთებულ შტატებს შორის და ეს გულისხმობს იმას, რომ ჩვენ მივესალმებით ამერიკულ ინვესტიციებს საქართველოში, აშშ-ს გაზრდილ გავლენას შავი ზღვის რეგიონში", — თქვა გიგა ლემონჯავამ (IPN).

შეგახსენებთ, საქართველოში აშშ-ის სახელმწიფო დეპარტამენტის წარმომადგენლები ოფიციალური ვიზიტით იმყოფებიან. დელეგაცია ქვეყანაში 24 მაისს ჩამოვიდა და ვიზიტს 29 მაისამდე გააგრძელებს.

ვიზიტის ფარგლებში ამერიკელი წარმომადგენლები უკვე შეხვდნენ ხელისუფლებისა და პოლიტიკური პარტიების წარმომადგენლებს.